Yakshanba, 22-noyabr, 2026
Havo 84 o‘rtacha Tirbandlik xaritasi
🌤 +14° kechasi +9°

Toshkentga Qozog‘istondan changli havo kirib kelmoqda

Poytaxtda so‘nggi besh kun davomida yog‘ingarchilik kuzatilmagani, shamol tezligining pastligi va havo almashinuvi sustligi ifloslantiruvchi moddalar atmosferada to‘planishiga sharoit yaratmoqda. Bundan tashqari, Qozog‘iston hududidan Toshkentga transchegaraviy chang massalari kirib kelmoqda.

1 daqiqa o‘qiladi

Changli havo

Toshkent shahrida so‘nggi besh kun davomida yog‘ingarchilik bo‘lmagani, shamolning nisbatan sustligi va atmosfera havosining yetarli darajada almashmayotgani ifloslantiruvchi moddalar tarqalishini cheklamoqda. Natijada havodagi turli zarrachalarning tarqalishi qiyinlashib, ularning atmosferada saqlanib qolishiga sharoit yuzaga kelmoqda.

Shu bilan birga, Qozog‘iston hududidan havo oqimlari orqali transchegaraviy chang massalari Toshkent viloyati va poytaxt tomon harakatlanmoqda.

Monitoring stansiyalarida chang miqdori oshgani qayd etildi

Ushbu holat O‘zgidromet tomonidan Toshkent shahri bo‘ylab o‘rnatilgan atmosfera havosi sifatini kuzatuvchi avtomatik monitoring stansiyalari ma’lumotlarida ham aks etgan.

Poytaxt ichidagi monitoring stansiyalarida ifloslantiruvchi moddalar konsentratsiyasining keskin oshishi kuzatilmagan. Biroq 2026-yil 17–21-noyabr kunlari chegaraoldi avtomatik stansiyalarida o‘tkazilgan kuzatuvlar PM2.5 va PM10 zarrachalari miqdori yuqori bo‘lganini ko‘rsatgan.

Bu ko‘rsatkichlar chang massalari Toshkentga tashqi hududlardan kirib kelayotganini tasdiqlovchi muhim dalillardan biri hisoblanadi.

Xususan, “Sofiya” va “Green University” chegaraoldi monitoring stansiyalarida mazkur davrda PM2.5 hamda PM10 zarrachalari konsentratsiyasining yuqori ko‘rsatkichlari qayd etilgan.

Mahalliy manbalar ham havo sifatiga ta’sir ko‘rsatmoqda

Atmosfera havosining ifloslanishiga faqat tashqi hududlardan kirib kelayotgan chang massalari sabab bo‘lmaydi. Avtotransport vositalaridan chiqadigan gazlar, qurilish maydonlaridagi chang va sanoat korxonalari faoliyati natijasida atmosferaga chiqariladigan tashlamalar ham Toshkent havosi sifatiga ta’sir qiluvchi mahalliy omillar hisoblanadi.