JSST smartfonlardan foydalanuvchilar yoshini cheklashga chaqirdi

Jahon sog‘liqni saqlash tashkiloti (JSST) smartfonlarga bo‘lgan qaramlikni chekishga qiyoslab, mamlakatlarni ushbu texnologiyalardan foydalanishni cheklash imkoniyatlarini ko‘rib chiqishga chaqirdi. JSSTning milliy strategiyalar va sog‘liqni saqlash tizimlari bo‘yicha direktori Natasha Azzopardi Muskat bu haqda bayonot berdi.

Yoshga cheklov

Muskatning so‘zlariga ko‘ra, o‘smirlarga texnologiyalar salbiy ta’sir ko‘rsatmasligi uchun smartfon foydalanuvchilarining yoshini cheklash, qurilmalar narxini oshirish va ularni ayrim joylarda ishlatishni taqiqlash zarur. U bu cheklovlarni chekishga qarshi choralarga o‘xshatdi va ba’zi joylarda smartfonlar to‘g‘risidagi qoidalarning joriy etilishi talab qilinishi mumkinligini aytdi.

Smartfonlar o‘smirlarga qanday ta’sir ko‘rsatmoqda?

Muskatning fikricha, smartfonlarning nazoratsiz ishlatilishi o‘smirlarning o‘qish, ruhiy salomatlik va ish unumdorligiga salbiy ta’sir ko‘rsatishi mumkin. Shu bilan birga, Buyuk Britaniyaning Sheffild-Hallam universiteti bolalar psixologiyasi bo‘yicha tadqiqotchisi Liana Azevedo ham erta yoshda smartfonlardan foydalanish uzoq muddatli zarar yetkazishi mumkinligini ta’kidlagan.

Ushbu cheklovlar sog‘liqni saqlash sohasida texnologiyalarning salbiy ta’sirlarini kamaytirishga qaratilgan choralar sifatida ko‘rib chiqilmoqda.

Ijtimoiy tarmoqlarga tobelik

Avvalroq JSST 11 foiz o‘smirlarda ijtimoiy tarmoqlarga tobelik belgilari kuzatilganini e’lon qilgan edi. Qiz bolalar orasida bu ko‘rsatkich o‘g‘il bolalarga nisbatan yuqori. O‘smirlarning uchdan bir qismidan ko‘prog‘i (36 foiz) do‘stlari bilan muntazam ravishda onlayn aloqada bo‘lishadi. O‘smirlarning taxminan 34 foizi har kuni raqamli o‘yinlarni o‘ynaydi, ularning 22 foizi kuniga to‘rt soatdan ko‘proq vaqt sarflaydi.