O‘zbekiston va AQSh $12 mlrdlik loyihalar bo‘yicha kelishuvga erishdi: 54 ta bitim nimalarni o‘z ichiga oladi?

O‘zbekiston va AQSh savdo, investitsiyalar va texnologiyalar sohasida umumiy qiymati $12 mlrd bo‘lgan 54 ta kelishuvni imzoladi. Bitimlarda GE Aerospace, Wabtec, Citigroup, BlackRock va Amazon Leo kabi kompaniyalar ishtirok etadi. Loyihalar aviatsiya, temiryo‘l transporti, energetika, konchilik, moliya va raqamli texnologiyalar sohalarini qamrab oladi.

Bu haqda O‘zbekiston Investitsiyalar, sanoat va savdo vazirligi ma’lum qildi. Kelishuvlarga AQSh Davlat kotibi Marko Rubio hamda 200 dan ortiq amerikalik tadbirkorning Samarqandga tashrifi davomida erishilgan.

Transport sohasida qanday loyihalar amalga oshiriladi?

Hamkorlikning asosiy yo‘nalishlaridan biri transport infratuzilmasini modernizatsiya qilishdan iborat.

GE Aerospace kompaniyasi Uzbekistan Airways aviakompaniyasining yangi samolyotlari uchun dvigatellar yetkazib berishni nazarda tutgan. Wabtec bilan hamkorlik esa temiryo‘l texnikasi va ehtiyot qismlari ishlab chiqarishni mahalliylashtirishga qaratilgan.

O‘zbekiston xalqaro investorlarni jalb qilmoqchi

Kelishuvlarning yana bir qismi moliya sektori va milliy kompaniyalarning xalqaro kapital bozorlariga chiqishi bilan bog‘liq.

Franklin Templeton, Oppenheimer & Co., Citigroup va BlackRock bilan tuzilgan bitimlar institutsional investorlarni jalb qilish, xalqaro moliyalashtirish imkoniyatlarini kengaytirish va infratuzilma loyihalarini moliyalashtirishga qaratilgan.

Konchilik va zamonaviy texnologiyalar sohasidagi hamkorlik

Konchilik sohasida ReElement Technologies, Traxys va Trafigura kompaniyalari bilan hamkorlik konlarni o‘rganish va o‘zlashtirish, texnologik hamkorlik hamda mineral resurslarni yetkazib berishni qamrab oladi.

Boshqa tashabbuslar Amazon Leo ishtirokida sun’iy yo‘ldosh aloqasini rivojlantirish, GE HealthCare bilan tibbiy texnologiyalarni joriy etish va Valmont Industries bilan qishloq xo‘jaligi samaradorligini oshirishni nazarda tutadi.

Umuman olganda, kelishuvlar energetika, raqamli texnologiyalar, sog‘liqni saqlash va ta’lim sohalarini ham qamrab oladi.

Keyingi qadam nima?

Investitsiyalar, sanoat va savdo vazirligi ma’lumotiga ko‘ra, endi asosiy e’tibor erishilgan kelishuvlarni amalda bajarishga qaratiladi.

Umumiy qiymati $12 mlrdga baholangan loyihalar O‘zbekiston va AQSh o‘rtasidagi savdo-iqtisodiy aloqalarni mustahkamlash hamda ikki mamlakat kompaniyalari o‘rtasidagi hamkorlikni kengaytirishga xizmat qilishi kutilmoqda.