Futzal: Toshkent tarixiy finalga mezbonlik qiladi

Bugun, 6-oktyabr kuni yurtimizda davom etayotgan futzal bo‘yicha jahon chempionatining so‘nggi uchrashuvlari bo‘lib o‘tadi. 17:30 da Fransiya va Ukraina bronza medal uchun bahs olib borsa, 20:00 da Argentina va Braziliya terma jamoalari final uchrashuvida maydonga tushadi. Har ikki bahs "Humo arena"da bo‘lib o‘tadi.

Jahon chempionatlari tarixi 

futzal bo‘yicha jahon chempionatlari tarixda 10 marta o‘tkazilgan bo‘lsa, shuning beshtasida (1989, 1992, 1996, 2008, 2012-yillarda) Braziliya chempion bo‘lgan. Braziliyaliklar 2000-yili finalda, 2004-yili esa yarim finalda Ispaniyaga imkoniyatni boy bergan. 2016-yilgi mundialda esa Braziliya nimchorak finaldayoq Eronga sensatsion tarzda mag‘lubiyatga uchragan, 2021-yili esa yarim finalda aynan Argentinaga 1:2 hisobida yengilgan (ammo finalda Argentinaning o‘zi Portugaliyaga mag‘lub bo‘lgan). Argentina faqat bir marta — 2016 yilgi jahon chempionatida g‘olib chiqqan. O‘shanda Janubiy Amerika vakillari dramatik kechgan finalda Rossiyani 5:4 hisobida mag‘lub etgan edi.

Janubiy Amerika derbisi

Bugungi final o‘yini Jahon chempionatlari tarixida o‘ziga xos tarix yaratadi. Biz bugungi o‘yin tomoshasi orqali futzal bo‘yicha Jahon chempionatlarining finalida ilk bor Janubiy Amerika derbisi guvohiga aylanamiz. Shu kungacha bunday voqea ro‘y bermagan. JCH-1992 finalida Braziliya (J.Amerika) va AQSH (Sh.Amerika) hamda 2004 yilgi mundial finalida Ispaniya va Italiya (ikkisi Yevropa) o‘zaro bellashgan. Qolgan barcha finallarda muxlislar albatta Janubiy Amerika va Yevropa terma jamoalari qarama-qarshiligiga guvoh bo‘lishgan.

O‘zaro o‘yinlar tarixi

Shu kungacha futzal mundiallarida bu ikki jamoa o‘zaro 7 bor to‘qnash kelishgan. 6 ta uchrashuvda Braziliya g‘alaba qozongan bo‘lsa, bitta bellashuv Argentina foydasiga hal bo‘lgan. JCHlardagi o‘zaro o‘yinlar:

JCH-1989, Ispaniya

Braziliya - Argentina 6:3

JCH-1992, Gonkong

Braziliya - Argentina 5:1

JCH-2000, Gvatemala

Braziliya - Argentina 4:1

JCH-2004, Xitoy Taypeyi

Braziliya - Argentina 2:1

Braziliya - Argentina 7:4

JCH-2012, Tailand

Braziliya - Argentina 3:2

JCH-2021, Litva

Argentina - Braziliya 2:1