O‘zbek futboli tarixidagi yagona va so‘nggi tarixiy chempionlikka 30 yil to‘ldi

Bugun, 16-oktyabr kuni O‘zbekiston milliy jamoasi Osiyo o‘yinlarida chempionlikni qo‘lga kiritganiga 30-yil to‘ldi. Bu cho‘qqi hali hamon mamlakat terma jamoasi uchun etalon bo‘lib kelmoqda.

Yagona va so‘nggi...

1994-yilning oktyabr oyi o‘zbek futboli tarixi sahifalariga oltin harflar bilan zikr etilgan. O‘shanda Yaponiyada o‘tgan Osiyo o‘yinlarida O‘zbekiston milliy terma jamoasi finalda xitoylik futbolchilarni 4:2 hisobida dog‘da qoldirib, chempionlikni rasmiylashtirishgan edi. Mana o‘sha olamshumul voqelikka ham 30-yil to‘ldi. Oradan shuncha vaqt o‘tgan bo‘lsa-da, mazkur muvaffaqiyat mamlakat bosh jamoasining o‘z faoliyatida qo‘lga kiritgan yagona va so‘nggi bo‘lib qolmoqda. 

Osiyo o‘yinlari

O‘zbekiston mustaqil ravishda ilk marotaba 1994-yili Yaponiyaning Xirosima shahridagi XII Osiyo o‘yinlarida ishtirok etgan. O‘yinlar 1994-yilning 2-16-oktyabr kunlari tashkil etilgan. O‘sha qit’a o‘yinlarida 135 nafar o‘zbekistonlik sportchi yurtimiz sharafini himoya qilgan. Musobaqa yakuniga ko‘ra terma jamoamiz a’zolari 11 ta oltin, 12 ta kumush va 19 ta bronza medallariga ega chiqishgan. Umumiy hisobda 42 ta medal qo‘lga kiritilgan.

Musobaqa tafsiloti

Xirosimada o‘tgan musobaqada O‘zbekiston B guruhida Saudiya Arabistoni, Malayziya, Gonkong va Tailandni mag‘lub etib, 12 ochko bilan pley-offga yo‘l olgan. Birodar Abduraimov va Rustam Akramov boshchiligidagi jamoa 1/4 finalda Turkmanistondan (3:0), yarimfinalda esa Janubiy Koreyadan (1:0) ustun kelgan. Finalda esa Xitoy 4:2 hisobida mag‘lub etilgan va tarixiy chempionlikka erishilgan.

Futbol terma jamoamiz tarkibida quyidagi futbolchilar to‘p tepishgan:

Yuriy Sheykin

Fevzi Davletov

Andrey Fyodorov

Mirjalol Qosimov

Farhod Magomedov

Ilhom Sharipov

Abduqahhor Marifaliyev

Sergey Lebedev

Igor Shkvirin

Azamat Abduraimov

Shuhrat Maqsudov

Rustam Do‘rmonov

Abdusamad Do‘rmonov

Ulug‘bek Ro‘zimov

Stepan Atayan

Berdax Allaniyazov

Aleksandr Tixonov.