Ayollarga nisbatan zo‘ravonlik qilganlarning 71 foizida doimiy ish joyi yo‘q

O‘zbekistonda 2026-yilning yanvar–iyun oylarida ayollarga nisbatan zo‘ravonlik va tazyiq o‘tkazish bilan bog‘liq 2018 ta jinoyat ishi sudlarda ko‘rib chiqilgan. Bu haqda Oliy sudning hisobotida ma’lum qilindi.

Ko‘rib chiqilgan ishlar soni oshgan

Hisobotga ko‘ra, 2026-yilning birinchi yarmida ko‘rib chiqilgan bunday jinoyat ishlari soni 2025-yilning shu davriga nisbatan 65,7 foizga ko‘paygan. O‘tgan yilning dastlabki olti oyida 1218 ta ish ko‘rib chiqilgan bo‘lsa, bu yil mazkur ko‘rsatkich 2018 taga yetgan.

Sudlarda ko‘rilgan ishlar jami 2480 nafar shaxsni qamrab olgan. Shulardan 1215 ta jinoyat ishi bo‘yicha 1624 nafar shaxsga nisbatan ayblov hukmlari chiqarilgan.

Bu ko‘rsatkichlar 2025-yilning mos davri bilan taqqoslanganda, ayblov hukmi chiqarilgan ishlar soni 337 taga, sudlangan shaxslar soni esa 521 nafarga oshganini ko‘rsatadi.

Jabrlanuvchilarning 581 nafari voyaga yetmagan

Oliy sud ma’lumotlariga ko‘ra, 2026-yilning dastlabki olti oyida zo‘ravonlik va tazyiq bilan bog‘liq jinoyat ishlari bo‘yicha 2146 nafar xotin-qiz jabrlanuvchi deb topilgan.

Yosh guruhlari bo‘yicha eng ko‘p jabrlanuvchilar 31 yoshdan 60 yoshgacha bo‘lgan ayollar hissasiga to‘g‘ri kelgan. Ushbu toifada 870 nafar jabrlanuvchi qayd etilgan.

18 yoshdan 30 yoshgacha bo‘lganlar orasida esa 654 nafar jabrlanuvchi bor. Bundan tashqari, 18 yoshga to‘lmagan 581 nafar qiz ham mazkur jinoyat ishlari doirasida jabrlanuvchi deb topilgan.

Sudlanganlarning aksariyati doimiy ish joyiga ega bo‘lmagan

Hisobotda sudlangan shaxslarning bandlik holati bo‘yicha ma’lumotlar ham keltirilgan. Unga ko‘ra, 2026-yilning birinchi yarmida sudlanganlarning 71 foizi, ya’ni 1165 nafari jinoyat sodir etgan vaqtda doimiy ish joyiga ega bo‘lmagan.