Fransiya Alisher Usmonovni YEI sanksiyalar ro‘yxatidan chiqarishni qo‘llab-quvvatlamoqda

Fransiya Slovakiyaning kelib chiqishi o‘zbekistonlik milliarder Alisher Usmonovni Yevropa Ittifoqining Rossiyaga qarshi sanksiyalar ro‘yxatidan chiqarish haqidagi talabini qo‘llab-quvvatlamoqda. Parijning bu pozitsiyasi YI davlatlari orasida noroziliklarga sabab bo‘lgan.

Parij Bratislava talabini qo‘lladi

Euronews muzokaralardan xabardor bo‘lgan to‘rt manbaga tayanib xabar berishicha, Slovakiya avvaldan Alisher Usmonov hamda milliarder Mixail Fridmanni Rossiyaning Ukrainaga qarshi urushi sabab joriy etilgan YI sanksiyalaridan chiqarishni talab qilib kelgan.

Endilikda Slovakiyaning mazkur talabi Fransiya tomonidan ham qo‘llab-quvvatlanmoqda. Nashr suhbatdoshlarining ta’kidlashicha, Parijning bu masaladagi pozitsiyasi Yevropa Ittifoqiga a’zo ayrim davlatlarda kuchli norozilikka sabab bo‘lgan.

Muzokaralardan xabardor diplomatlarning biri Fransiyaning bunday pozitsiyasi ortida iqtisodiy manfaatlar bo‘lishi mumkinligini bildirgan.

Fransiya sanksiyalarni uzaytirishni baribir qo‘llab-quvvatlaydi

Shu bilan birga, Fransiyaning Yevropa Ittifoqidagi doimiy vakolatxonasi Parij Rossiyaga qarshi sanksiyalarning umumiy amal qilish muddatini uzaytirish tarafdori ekanini bildirgan.

Ya’ni, Usmonovni sanksiyalar ro‘yxatidan chiqarish tashabbusi Rossiyaga qarshi cheklovlarni bekor qilish talabi sifatida emas, balki Slovakiya bilan kelishuvga erishish uchun siyosiy murosa sifatida ko‘rilmoqda.

Slovakiya sanksiyalarni uzaytirishga shart qo‘ymoqda

Bratislava Rossiyaga qarshi sanksiyalarni uzaytirish masalasida avval ham bir necha bor e’tiroz bildirgan. Slovakiya Alisher Usmonov va Mixail Fridmannning sanksiyalar ro‘yxatidan chiqarilishini talab qilmoqda.

Bundan tashqari, Slovakiya jismoniy shaxslarga nisbatan qo‘llanayotgan sanksiyalarni hozirgi tartibda — har olti oyda qayta ko‘rib chiqish tizimini saqlab qolishni istamoqda. Shu bilan birga, cheklovlarni bir yil muddatga uzaytirish varianti ham muhokama qilinmoqda.

Bir davlatning qarshiligi yetarli

Yevropa Ittifoqida bunday sanksiyalarni uzaytirish uchun barcha 27 a’zo davlatning roziligi talab etiladi. Shu sababli ittifoq tarkibidagi hatto bitta davlatning qarori ham umumiy kelishuvni bloklab qo‘yishi mumkin.

YI elchilari sanksiyalar masalasini muhokama qilish uchun 14-sentabr kuni yana yig‘ilishi kutilmoqda. Yakuniy kelishuv esa 15-sentabrgacha qabul qilinishi kerak.

Yevropa Ittifoqi Kengashi joriy yil mart oyida Rossiyaning Ukrainaga qarshi urushi bilan bog‘liq shaxslar va tashkilotlarga nisbatan joriy etilgan cheklovlarni yana olti oyga, ya’ni 2026-yil 15-sentabrgacha uzaytirgan edi.

Amaldagi sanksiyalar doirasida tegishli shaxslarning aktivlari muzlatiladi, ularning YI hududiga kirishi cheklanadi. Shuningdek, sanksiyaga tushgan jismoniy shaxslarga mablag‘ yoki boshqa iqtisodiy resurslarni taqdim etish taqiqlanadi.