2030-yilga borib dunyoda ochlikdan aziyat chekuvchilar soni 500 milliondan oshishi mumkin

Yaqin yillarda global ocharchilik bilan bogʻliq vaziyat yana yomonlashishi ehtimoli bor. BMTning Oziq-ovqat va qishloq xoʻjaligi tashkiloti (FAO) prognozlariga koʻra, 2030-yilga kelib 510–520 million kishi oziq-ovqat tanqisligiga duchar boʻlishi mumkin. Yaqin Sharqdagi nizolar oqibatlari, xususan, energiya manbalari hamda qishloq xoʻjaligi resurslari narxining oshishi taxminiy koʻrsatkichlarga salbiy taʼsir koʻrsatmoqda.

Oʻgʻitlarning qimmatlashishi mahsulotlar narxiga urishi mumkin

Qishloq xoʻjaligi sohasi yoqilgʻi, energiya va oʻgʻitlar narxiga doimiy ravishda bogʻliq. Agar ushbu resurslar narxi koʻtarilishda davom etsa, ishlab chiqaruvchilarning xarajatlari ortadi, bu esa oʻz navbatida, oziq-ovqat mahsulotlarining narxida ham aks etadi.

FAO Yaqin Sharqdagi inqiroz oqibatlari mintaqa sarhadlaridan chetga chiqib, boshqa mamlakatlarning oziq-ovqat tizimlariga ham salbiy taʼsir koʻrsatishi mumkinligidan ogohlantirmoqda.

Hozircha ochlik darajasi pasaymoqda

Yangi xavf-xatarlarga qaramay, soʻnggi yillarda dunyo boʻylab ocharchilik koʻrsatkichlari kamayishi kuzatildi. 2025-yilda taxminan 645 million kishi ochlikni boshdan kechirdi — bu 2024-yilgiga nisbatan 14 millionga, 2022-yilgi koʻrsatkichga qaraganda esa 43 millionga kamdir.

Shunga qaramay, FAO erishilayotgan bu natijalarni yetarlicha barqaror emas deb hisoblaydi. Joriy prognozlarda toʻliq hisobga olinmagan favqulodda ob-havo sharoiti hamda kuchli El-Ninyo hodisasi ham vaziyatni ogʻirlashtirishi mumkin.

Yangi xavf-xatarlar yuzaga kelgunga qadar, 2030-yilda ochlikdan aziyat chekuvchilar soni taxminan 503 million kishini tashkil etishi kutilayotgan edi.