Prevyu: “Nasaf” — “Al Husayn”

Shu kunlarda futbol bo‘yicha Osiyo chempionlar ligasi 2-musobaqasining g‘arbiy mintaqasida to‘rtinchi tur uchrashuvlari o‘tkazilmoqda. Bugun, tur doirasida Qarshining “Nasaf” futbol klubi o‘z tarixida ilk bor O‘zbekiston chempioni sifatida xalqaro musobaqada “Al Husayn” jamoasini mezbon qiladi.

O‘zaro o‘yinlar tarixi

Bugungi kunga qadar ushbu jamoalar faqatgina bir marotaba o‘zaro to‘qnash kelgan. U ham bo‘lsa, joriy yilning 23-oktyabrida, ayni shu chempionat doirasida bo‘lib o‘tgan. Ushbu o‘yinda Qarshi jamoasi Iordaniyada mezbon bo‘lib, 1:2 hisobida mag‘lubiyatga uchragan. Klub o‘yin davomida yomon harakatlanmagan bo‘lsa-da, ikkinchi bo‘limdagi raqiblar tarkibidagi o‘zgarishdan so‘ng o‘yin nazoratini mezbonlarga topshirib qo‘ydi va buning natijasida ketma-ket ikki gol o‘tkazib yubordi.

Jamoalarning so‘nggi o‘tkazgan o‘yinlari

“Nasaf” so'nggi bor 1-noyabr kuni Superliga 23-turi doirasida safarda “Lokomotiv”ni mag‘lub etib, muddatdan avval o‘z tarixida ilk bor O‘zbekiston chempionligini qo‘lga kiritdi. “Nasaf” 23 o‘yindan keyin 52 ochko jamg‘arib, chempionat yakuniga 3 tur qolganda muddatdan avval O‘zbekiston chempioniga aylandi. Ro‘ziqul Berdiyev shogirdlari o‘z tarixida ilk bor Superligada chempionlikni qo‘lga kiritib, Toshkent klublarining 23 yillik gegemonligiga chek qo‘ydi. Raqib jamoa ham so‘nggi bor 1-noyabr kuni mamlakat ichki chempionati doirasida o‘yin o‘tkazgan va 3:1 hisobida g‘alaba qozongan. Mehmonlar ayni dam Iordaniya chempionati jadvalida 22 ball bilan karvonboshilik qilmoqda.

Guruhdagi vaziyat

Osiyo chempionlar ligasi 2-musobaqasining “D” guruhidan o‘rin olgan "Al Husayn" – "Nasaf" jamoalari o‘rtasidagi birinchi o‘yin 2:1 hisobida yakunlangan edi. Ayni damda guruhda “Shabab Al-Ahli” va "Al Husayn" 6 ochko bilan guruh peshqadamiga aylangan. “Nasaf” esa 4 ochko bilan uchinchi o‘ringa joylashdi. “Kuvayt SK” uch o‘yindagi mag‘lubiyat evaziga so‘nggi pog‘onada qoldi.

Ma’lumot uchun, uchrashuv mahalliy vaqt bilan soat 19:00 da bo‘lib o‘tadi.