Supermarketlarda go‘sht, shakar, tuxum narxi pasaydi, guruch esa oshgan

O‘zbekiston Respublikasi Vazirlar Mahkamasi huzuridagi Makroiqtisodiy va hududiy tadqiqotlar instituti (MHTI) mutaxassislari 2024-yilning oktyabr oyida Toshkent shahridagi yirik supermarketlarda 21 nomdagi oziq-ovqat mahsulotlari narxining o‘zgarishini ko‘rib chiqdi.

9 mahsulot narxi pasaydi

Monitoring natijalari 9 nomdagi mahsulot bo‘yicha minimal narxlar o‘tgan oydagiga nisbatan pasayganini ko‘rsatdi.

Shunday qilib, sabzining minimal narxi 22,0 foiz, bodringniki 12,0 foiz, bananniki 9,8 foiz, grechkaniki 7,8 foiz, pomidorniki 6,3 foiz, mol go‘shtiniki (file) 5,9 foiz, shakarniki 1,6 foiz, kungaboqar yog‘iniki 1,4 foiz, tuxumniki 1,1 foiz pasaygan.

Qaysi mahsulotlar narxi oshgan?

5 nomdagi mahsulotning minimal narxlari oshgan. Narxining oshishi bo‘yicha guruch yetakchi bo‘ldi. Guruch narxining o‘sishi bozor omillari, talab va taklifning o‘zgarishi bilan bog‘liq.

7 nomdagi mahsulotning eng past narxlari o‘zgarishsiz qolgan. Bular - makaron, karam, lavlagi, sariq piyoz, olma, limon va margarin.