Nukusda bazalt va mahalliy xomashyodan qurilish materiallari ishlab chiqarish kengaymoqda

Qoraqalpog‘istonda mahalliy xomashyodan foydalanib, zamonaviy qurilish materiallari ishlab chiqarishga qaratilgan loyihalar ko‘lami kengaymoqda. Prezident Shavkat Mirziyoyev Nukus shahrida faoliyat yuritayotgan “Nukus Insulation Group” va “Coals KS” korxonalaridagi ishlab chiqarish jarayonlari bilan tanishdi.

“Nukus Insulation Group”: yiliga 50 ming tonna issiqlik izolyatsiyasi materiali ishlab chiqariladi

“Nukus Insulation Group” korxonasida Qoraqalpog‘istonda qazib olinadigan bazalt xomashyosidan zamonaviy issiqlik izolyatsiyasi materiallari tayyorlanmoqda.

Mazkur loyiha Qoraqalpog‘istonning tabiiy resurslaridan samarali foydalanish, hududda qurilish materiallari sanoatini rivojlantirish va yangi ish o‘rinlari yaratishga qaratilgan.

Korxona davlat rahbarining 2024-yil 9-fevraldagi “Qoraqalpog‘iston Respublikasini kompleks ijtimoiy-iqtisodiy rivojlantirish va aholi bandligini ta’minlashning qo‘shimcha chora-tadbirlari to‘g‘risida”gi qarori asosida tashkil etilgan.

Loyihaning umumiy qiymati 50 million dollarni tashkil etadi. Korxonaga Yevropada ishlab chiqarilgan zamonaviy texnologik uskunalar o‘rnatilgan bo‘lib, ular mahalliy xomashyodan xalqaro standartlarga javob beradigan mahsulot ishlab chiqarish imkonini beradi.

Ishlab chiqarish majmuasining yillik quvvati 50 ming tonna issiqlik izolyatsiyasi materialini tashkil etadi. Ushbu mahsulotlarning umumiy qiymati yiliga 300 milliard so‘mga teng.

Korxonada 150 ta yangi ish o‘rni yaratilgan.

Bazalt izolyatsiyasi binolarning energiya samaradorligini oshiradi

Korxonada ishlab chiqarilayotgan bazalt asosidagi izolyatsiya materiallari yong‘inga chidamliligi, issiqlikni yaxshi saqlashi va uzoq muddat xizmat qilishi bilan ajralib turadi.

Ushbu materiallardan qurilishda foydalanish bino va inshootlarning energiya samaradorligini oshirish imkonini beradi. Natijada isitish va sovitish uchun sarflanadigan xarajatlarni kamaytirish mumkin.

Prezident Shavkat Mirziyoyev korxonadagi ishlab chiqarish jarayoni hamda tayyor mahsulotlar bilan tanishdi. Davlat rahbari korxona jamoasi bilan ham muloqot qildi.

Shuningdek, shu yerda Qoraqalpog‘iston tumanlariga biriktirilgan viloyatlar hokimlari o‘tgan davrda bajarilgan ishlar yuzasidan axborot berdi.

Prezident viloyatlar ko‘magida Qoraqalpog‘iston tumanlarini qo‘llab-quvvatlash va ularni obodonlashtirish bo‘yicha ishlarni yanada kengaytirish zarurligini ta’kidladi.

Hududlar o‘rtasidagi aloqalarni mustahkamlash, ishlab chiqarish kooperatsiyasini rivojlantirish va mavjud imkoniyatlardan birgalikda foydalanish muhimligi qayd etildi. Bunda aholi bandligi va daromadlarini oshirishga xizmat qiladigan yangi loyihalarni ko‘paytirishga alohida e’tibor qaratish lozimligi ta’kidlandi.

“Coals KS”da gazoblok va ohak ishlab chiqarilmoqda

Davlat rahbari Nukus shahridagi “Coals KS” korxonasida ham bo‘lib, uning faoliyati bilan tanishdi.

Umumiy qiymati 16,3 million dollarlik loyiha doirasida gazoblok va ohak ishlab chiqarish yo‘lga qo‘yilgan.

Gazoblok ishlab chiqarish uchun “Nukus” erkin iqtisodiy zonasidan 4,8 gektar yer maydoni ajratilgan. Ohak ishlab chiqarish quvvatlari esa Qorao‘zak tumanidagi 4,8 gektar maydonda joylashtirilgan.

Korxona bir yilda 300 ming kub metr gazoblok va 165 ming tonna ohak ishlab chiqarish imkoniyatiga ega.

Mazkur ishlab chiqarish quvvatlari ichki bozorni zamonaviy qurilish materiallari bilan ta’minlash bilan birga, eksportni ham kengaytirish imkonini beradi. Kelgusida korxona mahsulotlarini Qozog‘iston va Turkmanistonga eksport qilish rejalashtirilgan.

Xomashyoning 96 foizi mahalliy manbalardan olinadi

Korxona ishlab chiqarishida foydalaniladigan xomashyoning 96 foizi mahalliy manbalar hisobidan ta’minlanadi.

Jumladan, kvars qumi, sement va gips O‘zbekistondagi korxonalar tomonidan yetkazib berilmoqda. Mahalliy xomashyodan foydalanish mahsulot tannarxini pasaytirish hamda ishlab chiqarish uchun zarur ta’minotning barqarorligini ta’minlashda muhim omil bo‘lmoqda.

“Coals KS”da ishlab chiqarilayotgan gazobloklar yengilligi, issiqlikni saqlash va tovush izolyatsiyasi xususiyatlari bilan ajralib turadi.

Ularning og‘irligi oddiy pishiq g‘ishtnikiga nisbatan 3–4 barobar kam. Bu esa qurilish jarayonida xarajatlarni kamaytirish imkonini beradi.

Korxonada 200 nafar mahalliy aholi ishlamoqda

Ayni paytda “Coals KS” korxonasida 200 nafar mahalliy aholi mehnat qilmoqda.

Korxona shu kungacha umumiy qiymati 200 million dollar bo‘lgan 5 ta yirik loyihani ishga tushirgan. Bundan tashqari, umumiy qiymati 40 million dollar bo‘lgan yana 4 ta yangi loyiha bo‘yicha qurilish ishlari davom etmoqda.

Prezident Shavkat Mirziyoyev ishlab chiqarish jarayonlari va tayyor mahsulotlarni ko‘zdan kechirib, korxonaning kelgusidagi rejalari yuzasidan axborot oldi. Davlat rahbari ishchilar bilan ham muloqot qildi.

Korxona faoliyatini rivojlantirishda mahsulot tannarxini kamaytirish bilan birga uning sifatini yuqori darajada saqlash, ishlab chiqarish hajmini oshirish va eksport imkoniyatlarini kengaytirish muhimligi ta’kidlandi.

Shuningdek, xodimlarning malakasini muntazam oshirib borish zarurligi qayd etildi. Korxona rahbariyati va soha mas’ullariga shu yo‘nalishlarda tegishli tavsiya va topshiriqlar berildi.