Har 4 nafar 26 yoshli zumerdan faqat bittasi farzandli
Hozirgi yoshlar ota-ona bo‘lishga avvalgi avlodlar kabi shoshilmayapti. AQShda o‘tkazilgan tadqiqotga ko‘ra, 26 yoshli zumerlar orasida farzandli bo‘lganlar ulushi oldingi avlodlarga nisbatan deyarli ikki baravar kam.
2 daqiqa o‘qiladi
Olimlar bunga pul yetishmasligi, kelajak haqidagi xavotirlar va sog‘liq bilan bog‘liq muammolar sabab bo‘lishi mumkinligini aytmoqda.
26 yoshli zumerlarning atigi 26 foizi farzandli
Atlanta Federal zaxira banki mutaxassislari AQShda 2023-yilgacha o‘tkazilgan Oilalar kengayishi bo‘yicha milliy so‘rovnoma ma’lumotlarini o‘rganib chiqdi. Natijalar avlodlar o‘rtasida katta farq borligini ko‘rsatdi. Xususan, 26 yoshli zumerlarning atigi 26 foizida kamida bitta farzand bor.
Xuddi shu yoshdagi milleniallarda bu ko‘rsatkich 47 foiz, X avlodida 50 foiz, bebi-bumerlarda esa 46 foiz bo‘lgan. Demak, bugungi yoshlar avvalgi avlod vakillariga qaraganda 26 yoshga kelib ancha kam farzandli bo‘lmoqda.
Yoshlar nega farzandli bo‘lishni kechiktirmoqda?
Tadqiqotchilar buning asosiy sabablaridan biri sifatida moliyaviy qiyinchiliklarni ko‘rsatmoqda. Farzandni katta qilish, uy-joy va kundalik xarajatlarni qoplash ko‘pchilik yoshlar uchun oson emas. Kelajakdagi hayot va moliyaviy barqarorlik haqidagi xavotirlar ham ularning qaroriga ta’sir qilmoqda. Shu sababli ayrim yoshlar avval o‘z hayotini yo‘lga qo‘yib, keyin farzandli bo‘lishni ma’qul ko‘rmoqda.
Farzand ko‘rish bilan bog‘liq muammolar ham ko‘paygan
Tadqiqotda yoshlarning reproduktiv salomatligiga ham e’tibor qaratilgan. Ma’lumotlarga ko‘ra, 26 yoshli zumerlar orasida homilador bo‘lish yoki homilani saqlab qolish bilan bog‘liq muammolar ehtimoli 18 foizni tashkil etgan.
Xuddi shu yoshdagi bebi-bumerlarda esa bu ko‘rsatkich 10 foiz bo‘lgan. Bu farq farzandli bo‘lishning kechikishi faqat yoshlarning shaxsiy xohishiga bog‘liq emasligini ko‘rsatmoqda. Moliyaviy sharoit, kelajakka ishonch va salomatlik bilan bog‘liq qiyinchiliklar ham bunda muhim o‘rin tutishi mumkin.
