Reklama qo‘ng‘iroqlari cheklanadi, posilkalar arzonlashadi va pensiyalar avtomatik tarzda tayinlana boshlaydi. 1-noyabrdan O‘zbekistonda nimalar o‘zgaradi?

2026-yil 1-noyabrdan O‘zbekistonda fuqarolar, tadbirkorlar va uyali aloqa abonentlariga daxldor bo‘lgan bir qator o‘zgarishlar kuchga kiradi.

Reklama xabarnomalari qoidalari o‘zgaradi, xalqaro kuryerlik jo‘natmalari uchun bojxona yig‘imi pasayadi, shuningdek, ayrim toifadagi fuqarolar uchun muddatidan oldin pensiya rasmiylashtirish tartibi soddalashtiriladi. Yangiliklar, shuningdek, biznes uchun elektr energiyasi va gaz to‘lovlari hamda suyultirilgan gaz yetkazib berishga ham ta’sir ko‘rsatadi.

Reklama qo‘ng‘iroqlari va SMS’lar cheklanadi

Noyabrdan boshlab uyali aloqa tarmoqlari orqali reklama qo‘ng‘iroqlari va xabarnomalarini soat 18:00 dan 09:00 gacha tarqatish taqiqlanadi. Bundan tashqari, uyali aloqa operatorlari abonentning talabiga ko‘ra bunday qo‘ng‘iroq va xabarlarni to‘liq yoki qisman bloklashi shart bo‘ladi.

SMS-reklama uchun alohida talab o‘rnatiladi: tovarlar, ishlar va xizmatlarni faqat abonentning yozma yoki elektron roziligi olingandagina reklama qilish mumkin bo‘ladi.

Xalqaro kuryerlik posilkalari arzonroq rasmiylashtiriladi

Xalqaro kuryerlik jo‘natmalarini rasmiylashtirish uchun bojxona yig‘imi stavkasi 20 foizga kamayadi. Bu o‘zgarish aynan bojxona rasmiylashtiruvi yig‘imiga taalluqli bo‘lib, xorijdan buyurtma qilingan mollarni olishdagi barcha to‘lovlar avtomatik ravishda pasayishini anglatmaydi.

Ayrim fuqarolarga pensiya tayinlash osonlashadi

Alohida toifadagi fuqarolarga yoshga doir pensiya umumbelgilangan pensiya yoshidan ikki yil oldin proaktiv shaklda tayinlanadi. Gap ish hajmi qisqarishi yoki korxona tugatilishi munosabati bilan ishsiz deb topilgan fuqarolar haqida bormoqda.

Bunda og‘ir va zararli sharoitlarda ishlagan fuqarolar, shuningdek, muddatidan oldin pensiya olish huquqiga ega bo‘lgan boshqa shaxslar tegishli xizmatlardan foydalanish uchun davlat xizmatlari markazlari yoki Yagona interaktiv davlat xizmatlari portali orqali murojaat qilishlari mumkin bo‘ladi.

Biznes uchun elektr energiyasi va gaz bo‘yicha oldindan to‘lov 15 foizni tashkil qiladi

Elektr energiyasi va tabiiy gazni hisobga olish avtomatlashtirilgan tizimlariga ulangan tadbirkorlar uchun oylik iste’mol oldindan to‘lovi miqdori 15 foiz etib belgilanadi.

Suyultirilgan gaz birja orqali yetkazib beriladi

“LPG-Trade” kompaniyasi aholiga suyultirilgan gazni xarid qilish va yetkazib berishning birja mexanizmiga o‘tadi. Ijtimoiy soha obyektlari uchun yoqilg‘i ham bozor tamoyillari asosida shakllanadigan birja narxlarida sotiladi.

PXX naryadlari turar joy binolariga ham yetib boradi

Ichki ishlar organlarining patrul-post va qo‘riqlash xizmati naryadlari “112” tizimi orqali kelib tushgan xabarlarga asosan, nafaqat jamoat joylarida, balki o‘z patrul hududidagi turar joy binolarida sodir bo‘lgan voqea joyiga ham yetib boradilar.

Shuningdek, ommaviy tadbirlar vaqtida jamoat tartibini buzgan fuqarolarning kelgusidagi ommaviy tadbirlarga kirishi cheklanadi.

Tashkilotlar arxivga oid ma’lumotlarni elektron shaklda topshiradi

Tashkilotlar, jumladan, nodavlat arxivlar o‘zlarida saqlanayotgan arxiv hujjatlari to‘g‘risidagi ma’lumotlarni arxiv axborot tizimi orqali davlat arxivlariga taqdim etishga majbur bo‘ladilar.