“O‘zingizni orzularingizga munosib deb biling” – xalqaro biznesni zabt etayotgan Feruza Nizomova

 Aqli, tirishqoqligi, zavokati bilan avval nufuzli ta’lim dargohlarini, keyin esa obro‘li xalqaro kompaniyalarni zabt etayotgan iste’dodli o‘zbekistonliklardan biri bu – Feruza Nizomova. Yevropadagi eng yirik banklardan biri bo‘lgan BNP Paribas’ning AQSHdagi korporativ va institutsional bankchilik sho‘basidagi faoliyati orqali kompaniyadagi samaradorlikni naq 25 foizgacha oshirishda bevosita ishtirok etgan.

Feruza UZ24 bilan suhbatda o‘zining muvaffaqiyat yo‘lini hikoya qilib berdi.

Muddatidan avval erishilgan natija

“Bolaligim Buxoroyi sharifda o‘tgan. Maktab davridanoq ilmga tashna edim, har doim olimpiadalarda o‘rin olar, ayniqsa tarix fanini juda sevib o‘rganardim. O‘z ustimda tinimsiz ishlashim litseyda ham davom etdi. Matematika va ingliz tili bilan intensiv ravishda shug‘ullanar, o‘tirsam ham tursam ham shu fanlarni o‘qiganim o‘qigan edi. Va bularning bari besamar ketmadi: uchinchi bosqichga kelganda oliy ta’limni xorijda davom ettirish uchun shu ikki yo‘nalishdagi imtihonlarda yetarli ballni qo‘lga kiritib bo‘lgandim va endi vaqtimni pianino chalish, suzish mashg‘ulotlari va boshqa fanlarni o‘rganishga bemalol sarflashim mumkin edi”.

Feruza bakalavr ta’limi uchun Shimoliy Uelsning Bangor universiteti sanoat menejmenti yo‘nalishini tanlaydi. Biznes tahlili yo‘nalishida MBA darajasi uchun esa Pensilvaniyaning Lihay universitetida tahsil olib, uni 3,2 GPA (o‘rtacha baho) bilan tamomlaydi. “Magistratura tahsili chog‘ida direktor stipendiyasiga sazovor bo‘ldim. Borealis kompaniyasidan sanoat bo‘yicha murabbiyim bilan hamkorlikda ishlash sohaning past-balandliklari bilan tanishish, to‘g‘ri mo‘ljal olishimda muhim rol o‘ynadi”.

Samarali muloqot – biznes poydevori

Ta’limni yakunlagach, Feruza eng yirik xalqaro moliya kompaniyalaridan biri – BNP Paribas CIB’da ish boshladi. Sekyuritizatsiyalangan mahsulotlar savdosi bilan shug‘ullanadi. Yangi mijozlarni jalb qilishda faol ishtirok etib, mijozlar sonini 500dan 650ga oshirishga, yangi kredit shartnomalarining imzolanishiga muvaffaq bo‘ldi, kompaniyada umumiy samaradorlikni 25 foizgacha oshirishda muhim rol o‘ynadi. Shuningdek, global bozorlarda ayollarning roliga qaratilgan tadbirlarda ham doimiy ravishda faollik namoyish qilib kelmoqda.

U yirik kompaniyalarda muvaffaqiyatli faoliyat yuritishning kaliti – insonlar bilan til topa olish deb biladi. “Biznes borki, uni odamlar tashkil etadi. Turfa xil odamlar bilan til topa olish, qay o‘rinda mulozamat qilishni-yu, qay joyda tashabbusni qo‘lga olish kerakligini tushunish muhim o‘rin tutadi. Qolaversa, doimiy rivojlanib borish, o‘z sohasining bilimdoni bo‘lish shart. Va albatta bularning bari ingliz tili ko‘nikmalarisiz bo‘lmaydi”, – deydi u.

Feruza o‘zbekistonliklar asos solgan logistika kompaniyasi STL truckers’da biznesni rivojlantirish bo‘yicha maslahatchi sifatidagi faoliyati davomida Amazon, FedEx, UPS bilan yirik qiymatdagi shartnomalar imzolashga erishgan. Har bir mijozning ehtiyoj va istaklariga ixtisoslashgan xizmatlarni tashkil qilish hisobiga kompaniya daromadini karrasiga oshirgan.

Orzu + harakat + bilim + networking = muvaffaqiyat

Feruza ayni damda moliya sohasida ko‘proq tajriba va bilim orttirish ustida ishlamoqda. Maqsad – yaqin kelajakda logistika va tashuv sohasida o‘z texnologik startapini yo‘lga qo‘yish.

Qahramonimiz o‘z muvaffaqiyatini izohlarkan, karyera istagidagi yoshlarga tavsiya o‘rnida shunday deydi:

“Inson orzu qilishni bilishi va mana shu orzulariga o‘zini loyiq ko‘rishi, unga dadil harakatlar bilan intilishi kerak. Ish, daromad ilinjida xorijda yurgan o‘zbeklar ko‘p, ammo ular ko‘pincha og‘irroq vazifalarni bajarishadi, korporativ ishlarga o‘zlarini munosib ko‘rishmaydi. Yo‘q, aniq maqsad, unga yetaklovchi to‘g‘ri harakat, puxta bilim bo‘lsa, marra sizniki. Qolaversa, netvorking – yaxshi aloqalarga ega bo‘lish har qanday sohada muvaffaqiyatga erishishni osonlashtiradi”.