DXX Telegramdagi “hijrat” da’vatlari haqida ogohlantirdi
Diniy ta’lim niqobi ostida ayollarni xorijga “hijrat” qilishga chaqirish va ularni ekstremistik hamda terroristik tashkilotlarga jalb etish holatlari aniqlanayotgani ma’lum qilindi.
1 daqiqa o‘qiladi
Davlat xavfsizlik xizmati Telegram orqali diniy ta’lim berish ko‘rinishida olib borilayotgan, aslida esa ayollarni “hijrat” qilishga undash hamda xorijdagi ekstremistik va terroristik tashkilotlar safiga yollashga qaratilgan faoliyatdan fuqarolarni ogohlantirdi.
DXX ma’lumotlariga ko‘ra, “Ummu Muhammad” taxallusi ostida faoliyat yuritgan Me’rojixon Abobakirova ham shunday faoliyatni amalga oshirganlikda gumon qilinmoqda.
Jinoyat ishi qo‘zg‘atilgan
Me’rojixon Abobakirovaga nisbatan Jinoyat kodeksining 244²-moddasi bilan jinoyat ishi qo‘zg‘atilgan. Mazkur modda diniy ekstremistik, separatistik, fundamentalistik yoki boshqa taqiqlangan tashkilotlarni tuzish, ularga rahbarlik qilish yoki ularda ishtirok etish bilan bog‘liq jinoyatlarni nazarda tutadi.
Hozirda Abobakirova qidiruvga berilgan.
Fuqarolardan ma’lumot so‘raldi
DXX Me’rojixon Abobakirova hamda uning turmush o‘rtog‘i Sarvarbek Abobakirov haqida biror ma’lumotga ega bo‘lgan fuqarolarni bu haqda tegishli idoralarga xabar berishga chaqirdi.
Buning uchun DXXning 1520 yoki Ichki ishlar vazirligining 1102 ishonch telefonlariga murojaat qilish mumkin.
“Hijrat” da’vatlaridan ehtiyot bo‘lishga chaqiriq
DXX fuqarolarni diniy ta’lim niqobi ostida tarqatilayotgan “hijrat”ga chaqiriqlar, shuningdek, taqiqlangan tashkilotlarga jalb etishga qaratilgan turli takliflardan ehtiyot bo‘lishga chaqirdi.
