Turkmaniston rasmiylari O‘zbekiston bilan transchegaraviy turizmga qarshi keskin choralar ko‘rmoqda. Maqsad nima?

Turkmaniston rasmiylari O‘zbekiston bilan transchegaraviy turizmga qarshi keskin choralar ko‘rmoqda, chunki bu Ashxobodning o‘z fuqarolarini asosiy tovarlar va xizmatlar bilan ta’minlashga qodir emasligini ko‘rsatadi, deya yozmoqda “EurasiaNet”. 

Mamlakatdagi iqtisodiy muammolar va chegaradagi yangi qoidalar

Xabar qilinishicha, 2024-yilda turkmanistonliklarning O‘zbekistonga sayohat qilishlari bilan bog‘liq turizm o‘sish sur’ati kuzatilmoqda. Ko‘pchilik bu safarlardan so‘nggi yillarda og‘ir iqtisodiy inqirozga uchragan Turkmanistonda oson topilmaydigan oziq-ovqat va mahsulotlarni sotib olish uchun foydalangan.

So‘nggi bir oy ichida Turkmaniston bojxonachilari fuqarolar tez chegaradan o‘tishini oldini olish uchun yangi qoidalar joriy qilgan. Yangi qoidalarga ko‘ra, sayohatga chiqmoqchi bo‘lganlar mamlakatdan chiqishdan oldin nikoh guvohnomalari va yashash joyini tasdiqlovchi hujjatlar kabi bir qator hujjatlarni taqdim etishlarini talab qiladi.

“Sharmandalik”dan qochish

Toshhovuz viloyatidagi mahalliy aholining aytishicha, hujjatlarni taqdim eta olmagani uchun kamida o‘nlab shaxslar mamlakatni tark etishiga to‘sqinlik qilingan. Qayd etilishicha, turkman rasmiylari ko‘p fuqarolar O‘zbekistondan kerakli narsalarni sotib olish uchun foydalanayotganidan uyalib, chegara nazoratini kuchaytirish orqali buning oldini olmoqchi.

Chegaradan o‘tishning narxi

Shuningdek, bojxona agentiga “vositachilar” orqali taqdim etilgan 50 dollarlik “sovg‘a” shaxsning sayohat rejalarini to‘xtatib turadigan har qanday muammolarni hal qilishi mumkinligi xabar qilinadi.

“Bojxonachilar bu fuqarolarni (O‘zbekistonga borgan sayohatchilarni) savdo-sotiq bilan shug‘ullanib, mamlakatni sharmanda qilishda ayblaydi va shu bahona bilan ularni bojxona nazoratidan o‘tkazmaydi”, deyiladi xabarda.

Avvalroq, Oʻzbekistonga tijorat maqsadida kelgan chet elliklar soni 2,6 barobarga oshgani va tashrif buyurganlar orasida Turkmaniston Respublikasi 72 354 nafar bilan yetakchi boʻlib turgani haqida xabar bergan edik.