Harbiy xizmatga chaqiriluvchilar giyohvandlik vositalari bo‘yicha majburiy tekshiruvdan o‘tkaziladi

Mudofaa tizimida harbiy xizmatga qabul qilinayotgan fuqarolarni giyohvandlik vositalari bo‘yicha tibbiy tekshiruvdan o‘tkazish tartibi belgilandi. Tegishli idoraviy hujjat Adliya vazirligi tomonidan 2026-yil 14-sentabr kuni davlat ro‘yxatidan o‘tkazildi.

Yangi tartib giyohvandlik vositalarini iste’mol qilish holatlarini erta aniqlashga qaratilgan. Tekshiruvlar Respublika sud-tibbiy ekspertiza ilmiy-amaliy markazi hamda uning hududiy filiallarida amalga oshiriladi.

Muddatli harbiy xizmatga chaqirilayotgan fuqarolar hududiy harbiy-tibbiy komissiyaga yuborilishidan oldin tekshiruvdan o‘tkaziladi. Kontrakt bo‘yicha harbiy xizmatga qabul qilinayotgan fuqarolar esa harbiy-tibbiy muassasada ko‘rikdan o‘tishidan avval tekshiriladi.

Tekshiruv ikki bosqichda o‘tkaziladi

Belgilangan tartibga ko‘ra, tibbiy tekshiruv ikki bosqichdan iborat bo‘ladi. Dastlabki tekshiruvda musbat natija aniqlangan taqdirda, biologik namunalar bo‘yicha mass-spektrometrik identifikatsiya tekshiruvi o‘tkaziladi.

Tekshiruv natijasi musbat chiqqan fuqarolar, shuningdek, biologik namuna topshirishdan bosh tortgan shaxslar harbiy-tibbiy ko‘rikdan o‘tkazilmaydi.

Maxfiylik ta’minlanadi

Yangi tartibda tekshiruv jarayonida olingan shaxsiy ma’lumotlar, biologik namunalar va tekshiruv natijalarining maxfiyligini ta’minlash ham belgilangan.