BYD Uzbekistan to‘lagan soliqlaridan ko‘ra ko‘proq imtiyozlarga ega bo‘lgan

Kuni kecha UzAuto Motors’ning soliq imtiyozlari haqidagi maqola fonida Korrupsiyaga qarshi kurashish agentligining O‘zbekistonda 2024-yilning dastlabki olti oyida berilgan soliq va bojxona imtiyozlari hajmlari hisobotini taqdim etgan edik.

366,6 milliard so‘mdan ortiq soliqlar

Unga ko‘ra, 2024-yilning dastlabki olti oyida BYD Uzbekistan Factory 366,6 milliard so‘mdan ortiq soliqlarni byudjetga to‘lagan. Bu aylanmaning 21 foizini tashkil qiladi.

Lekin, zavodga to‘g‘ridan-to‘g‘ri soliq yuki 34,5 milliard so‘mni tashkil etdi. Bu esa aylanmaning atigi 2 foizi, byudjet to‘lovlarining qolgan qismi QQSga to‘g‘ri keladi - ammo bu bilvosita soliq bo‘lib, uni kompaniya emas, oddiy xaridorlar to‘laydi.

8 baravar ko‘proq imtiyoz

BYD 2024-yilning olti oyida atigi 34,5 milliard so‘m to‘g‘ridan-to‘g‘ri soliq to‘lagan bo‘lsa-da, eng yirik bojxona imtiyozlarini oldi — 274,4 milliard so‘m. Ushbu imtiyozlarga qaramay, BYD avtomobillarining rasmiy narxlari norasmiy importyorlarnikidan ancha yuqoriligicha qolmoqda.

Ikkita yirik avtomobil ishlab chiqaruvchisi imtiyozlari

O‘zbekistonning yana ikkita yirik avtomobil ishlab chiqaruvchisi yarim yil ichida 492,3 milliard so‘mlik imtiyozlarga ega bo‘ldi:

·      UzAuto Motors — 317,2 mlrd so‘m;

·      ADM Jizzakh — 175,1 mlrd so‘m.