Baxtiyor Komilov — Koreyada o‘qib, AQShda ishlayotgan ta’minot zanjiri va logistika mutaxassisi

Fargʻona viloyati, har doimgidek, isteʼdodli insonlarni yetishtirgan diyor boʻlib, bugungi kunda ham bu yurtning istiqbolli yoshlari orasida Baxtiyor Komilov alohida ajralib turadi. Fargʻonada tugʻilib oʻsgan Baxtiyorning Oʻzbekistondan Janubiy Koreya va soʻng AQShga qadar boʻlgan faoliyat yoʻli juda ibratli va ilhomlantiruvchi.

Baxtiyor oʻz akademik yoʻlini Janubiy Koreyaning Gvangju shahridagi Chonnam Milliy Universitetida boshladi. U bu yerda iqtisodiyot yoʻnalishi boʻyicha toʻliq grant asosida tahsil oldi. Talabalik davrida u xalqaro talabalar ofisida faoliyat yuritib, yangi kelgan talabalar uchun moslashish jarayonini yengillashtirishga koʻmak berdi. Baxtiyor xalqaro talabalarga yordam koʻrsatishda faol ishtirok etib, koʻp madaniyatli muhitda samarali ishlash koʻnikmalarini rivojlantirdi, bu esa uning logistika va taʼminot zanjiri sohasidagi kelajakdagi muvaffaqiyatlariga zamin yaratdi.

Gvangju shahrida u shahar maʼmuriyati bilan hamkorlikda Koreyaning tibbiy turizmini targʻib qilishda ishtirok etdi. Janubiy Koreyaga davolanish maqsadida kelgan xorijlik bemorlarga ingliz, rus va oʻzbek tillarida qoʻllab-quvvatlash xizmatlarini koʻrsatdi. Bu jarayonda Baxtiyor oʻz kommunikatsiya koʻnikmalarini rivojlantirib, muloqotda samaradorligini oshirdi. Shuningdek, u mahalliy radioda oyiga bir marotaba koreys hayotiga oid turli mavzularda chiqishlar qilib, jamoatchilik oldida chiqish qilish va oʻz malakasini oshirish imkoniyatidan foydalandi.

Baxtiyor faqat bakalavr darajasi bilan cheklanmay, oʻsha universitetda grant asosida MBA dasturida taʼlim olishni davom ettirdi. U biznes boshqaruvi, taʼminot zanjiri va logistika menejmenti boʻyicha chuqur bilim va amaliy koʻnikmalarga ega boʻldi. Magistratura davrida universitetning MBA ofisida yordamchi sifatida faoliyat yuritib, logistika va taʼminot zanjiri menejmentiga boʻlgan qiziqishini yanada kuchaytirdi. U ushbu sohada olib borilayotgan tadqiqotlar va yangi innovatsiyalar bilan tanishib, jahon standartlariga javob beradigan koʻnikmalarni egalladi.

Koreyada ishlab chiqaruvchi kompaniyada global logistika, savdo va eksport masalalarida mutaxassis sifatida faoliyat yuritgan Baxtiyor, Yevropa, Osiyo va Rossiyaga eksport jarayonlarini boshqarish orqali strategik hamkorliklarni yoʻlga qoʻyishda va yangi mijozlar bilan aloqalarni oʻrnatishda oʻz hissasini qoʻshdi. Bu jarayonda u taʼminot zanjiri menejmenti boʻyicha amaliy bilimlarini boyitdi va xalqaro logistika sohasida muhim tajriba orttirdi.

2022-yilda Baxtiyor AQShning Missuri-Sent-Luis universitetida ikki darajali MBA dasturiga oʻqishga kirib, taʼminot zanjiri menejmenti boʻyicha sertifikatga ega boʻldi. Bu yerda u koʻplab networking tadbirlarida ishtirok etib, mutaxassisligini yanada boyitdi. Baxtiyor oʻqish davomida talabalar uchun maslahatlar berib, logistika va taʼminot zanjiri boʻyicha oʻz bilimlarini boʻlishdi, shuningdek, yetakchilik va murabbiylik qobiliyatlarini rivojlantirishda oʻz tajribasidan foydalandi.

AQShdagi tahsilini yakunlash arafasida Baxtiyor ITF Group kompaniyasining HaulerHub loyihasida Onboarding va Compliance menejeri lavozimiga ishga qabul qilindi. U transport va logistika sohasidagi kompaniyalar bilan ishlashda yuqori natijalarga erishib, 2000 dan ortiq transport kompaniyalarini HaulerHub tizimiga integratsiyalash jarayonini boshqarib, platformaning samaradorligini oshirishga katta hissa qoʻshdi. Baxtiyorning tahlil va strategik fikrlash qobiliyati, shuningdek, jamoa bilan ishlashdagi muvaffaqiyati uni ushbu rol uchun ideal nomzodga aylantirdi.

Baxtiyor, shuningdek, konsalting sohasida ham taʼminot zanjiri va logistika boʻyicha tajriba orttirgan. U yangi ochilgan kompaniyalarning stabil rivojlanish davrigacha oʻzining amaliy va nazariy bilimlari bilan kompaniya rivojiga hissa qoʻshib kelmoqda. U yangi transport kompaniyasini boshqarishda yordam berib, kompaniyaning noldan oʻnta transport vositasigacha kengayishida muhim rol oʻynadi. Hozirda u oʻz transport kompaniyasini ishga tushirish va sunʼiy intellekt yordamida inventarizatsiya va talabni prognozlash platformasini yaratish ustida ish olib bormoqda.

Baxtiyor Komilovning logistika va taʼminot zanjiri sohasidagi innovatsiyalar va strategik yetakchilikka boʻlgan qiziqishi uni ushbu sohada yetakchi mutaxassis sifatida tanitmoqda. Uning xalqaro tajribasi va sohaga qoʻshayotgan hissasi erishayotgan muvaffaqiyatlarining asosi boʻlib xizmat qilmoqda. Baxtiyor oʻz ishini professional darajada olib borib, kelgusida taʼminot zanjiri va logistika sohasida yanada katta yutuqlarga erishish niyatida.

© Abdulloh Tursunov