O‘zbekiston haqida nomaqbul gaplarni gapirgan chet elliklarga taqiqlar tasdiqlandi

Bugun Oliy Majlis Senatining ellik yettinchi yalpi majlisi bo‘lib o‘tmoqda. Unda O‘zbekiston haqida nomaqbul bayonot bergan xorijliklarga taqiq joriy etish bo‘yicha qonun loyihasi Senat tomonidan ma’qullandi. 

O‘zgartirish zarurati

Qonunchilik palatasining bir guruh deputatlari “O‘zbekiston Respublikasida chet el fuqarolarining va fuqaroligi bo‘lmagan shaxslarning huquqiy holati to‘g‘risida”gi qonunga qo‘shimchalar kiritish haqidagi qonun loyihasini ishlab chiqishgandi. Qonunchilik palatasiga ko‘ra, bunga – O‘zbekistonning suvereniteti va hududiy yaxlitligini muhofaza qilish bo‘yicha qo‘shimcha chora-tadbirlar belgilash zarurati sabab bo‘lgan.

Qonun shartlari va mazmuni

Mazkur shaxslar tomonidan quyidagi mazmundagi ommaviy chiqishlar qilish yoxud harakatlar sodir etish ularni O‘zbekiston Respublikasida bo‘lishi nomaqbul deb topish uchun asos bo‘ladi:

– O‘zbekistonning davlat suverenitetiga, hududiy yaxlitligiga va xavfsizligiga zid bo‘lgan; davlatlararo, ijtimoiy, milliy, irqiy hamda diniy adovatni keltirib chiqaruvchi; O‘zbekiston xalqining sha’nini, qadr-qimmatini yoki tarixini tahqirlovchi.

Ikkinchidan, mamlakatda bo‘lishi nomaqbul deb topilgan chet el fuqarolari yoki fuqaroligi bo‘lmagan shaxslarga 5-yil davomida quyidagilar taqiqlanadi:

– O‘zbekistonga kirish, banklarda hisobvaraq ochish, ko‘chmas mulk sotib olish, davlat mulkini xususiylashtirishda ishtirok etish, moliyaviy va shartnomaviy munosabatlarga kirishish.

Uchinchidan, O‘zbekistonda vaqtincha turgan yoki doimiy yashaydigan chet el fuqarosi yoki vaqtincha turgan fuqaroligi bo‘lmagan shaxsning mamlakatda bo‘lishi nomaqbul deb topilishi uning O‘zbekiston hududida qonuniy asoslarda yashash va bo‘lish huquqini bekor qilishga hamda mazkur shaxs deportatsiya qilishga sabab bo‘ladi.

To‘rtinchidan, qonun loyihasida mamlakatda bo‘lishi nomaqbul deb topilgan shaxslarni deportatsiya qilish asoslari va tartibi nazarda tutilgan.

Deportatsiya chorasi

Bundan tashqari, shaxs mamlakatda bo‘lishi nomaqbul deb topilganligi to‘g‘risida Tashqi ishlar vazirligi xabarnomasini olgan kundan e’tiboran 10 kun ichida ixtiyoriy ravishda O‘zbekistondan chiqib ketishi kerak. Agar ushbu muddat ichida ixtiyoriy ravishda chiqib ketmasa, mazkur shaxs ichki ishlar organlari va boshqa vakolatli organlar tomonidan deportatsiya qilinadi, ya’ni majburiy tarzda chiqarib yuboriladi.