“Namangan suv ta’minoti” AJga nisbatan davlat xaridlari va tanlov savdolarida qonunbuzarlik bo’yicha chora ko’rildi
Raqobat qo‘mitasining Namangan viloyati hududiy boshqarmasi Namangan suv ta’minoti" AJ tomonidan 2023-2024-yillarda amalga oshirilgan davlat xaridlari yuzasidan o‘rganish va tahlillar olib borildi.
1 daqiqa o‘qiladi
O’rganishlar jarayonida davlat xaridlari va tanlov asosida amalga oshirilgan savdolarda qonunbuzarliklar aniqlangan.
Jami xaridlar
Namangan viloyat prokuraturasining topshirig‘iga ko‘ra, “Namangan suv ta’minoti” AJ buyurtmachiligida 2023-yil davomida hamda 2024-yil 16-iyun kuniga qadar jami 167 ta lot bo‘yicha boshlang‘ich narxi 4,9 mlrd. so‘mga yaqin amalga oshirilgan davlat xaridlari o‘tkazilgan.
Qonunbuzarlik
O‘rganishlar davomida mazkur aksiyadorlik jamiyati tomonidan yuqoridagi davlat xaridlarini amalga oshirishda "Raqobat to‘g‘risida"gi Qonun talablariga rioya etilmagani ma’lum bo‘ldi.
Bundan tashqari, buyurtmachi tomonidan 36 ta lot bo‘yicha boshlang‘ich narxi 846,1 mln so‘mlik tanlov savdolarida bir-biriga bog‘liq bo‘lgan (affillangan) jamiyatlar g‘olib deb topilganligi aniqlandi.
Belgilangan javobgarlik
Hududiy boshqarma tomonidan davlat xaridlarida “Raqobat to‘g‘risida”gi Qonun talablari buzilganligi yuzasidan Buyurtmachi tashkilotga (“Namangan suv ta’minoti” AJ) nisbatan tuzilgan ma’lumotlar huquqni muhofaza qiluvchi organga taqdim etildi.
Shuningdek, “Namangan suv ta’minoti” AJ mansabdor shaxslariga nisbatan ma’muriy jarima qo‘llash bo‘yicha ma’muriy bayonnoma rasmiylashtirilib, tegishli sud organiga ma’lumotlar yuborildi.
