Bayden va uning ittifoqchilari dunyoni qonga botirgan — Alisher Qodirov

“Milliy tiklanish” partiyasi yetakchisi Alisher Qodirov AQShning amaldagi prezidenti Jo Bayden va uning ittifoqchilarini tanqid qilib, keskin bayonot berdi.

Tramp kelgani emas, Bayden ketganidan mamnun deputat

Deputat o‘z nutqida nafaqat Trampning kelgani, balki Bayden va uning atrofidagilarning chekinishidan mamnunligini bildirdi, uning so‘zlariga ko‘ra, bu dunyoni qonli mojarolar va beqarorlikka olib keldi.

“Meni nafaqat Trampning kelishi, balki Bayden va uning dunyoni qonga botirgan ittifoqchilarining ketishi quvontiradi. Kelgusida Amerika Yevrosiyodagi o‘z manfaatlarini boshqariladigan davlatlararo inqirozlar orqali ta’minlaydi - bu endi hamma uchun tushunarli bo‘ldi”, — dedi Qodirov.

Turkiy davlatlar ittifoqini shakllantirish

U, shuningdek, mintaqa mamlakatlarining suverenitetini saqlash va mavqeini kuchaytirish uchun muqobil yondashuvni ham taklif etdi. U Xitoy va Rossiya kabi yirik geosiyosiy o‘yinchilarning manfaatlarini inobatga olgan holda, umumiy madaniy va tarixiy ildizlar asosida mamlakatlarni birlashtiradigan Turkiy davlatlar ittifoqini tuzish g‘oyasini ilgari surdi.

“Dunyo shaxmat taxtasida piyodaga aylanmaslik uchun, Xitoy va Rossiya manfaatlarini inobatga olgan holda Turkiy davlatlar ittifoqini shakllantirishimiz lozim, zero biz ular bilan umumiy ildizlar orqali bog‘langanmiz”, — deya ta’kidladi Qodirov.