Qishda ayrim oilalarga 1 million so‘mdan beriladi: kimlar bu pulni olishi mumkin?
Qish yaqinlashar ekan, gaz, elektr va isitish xarajatlari ko‘plab oilalar uchun qo‘shimcha tashvishga aylanmoqda. O‘zbekistonda ehtiyojmand aholiga yordam berish uchun yangi qaror qabul qilindi.
3 daqiqa o‘qiladi
Unga ko‘ra, ayrim oilalar noyabr oyida 1 million so‘mdan moddiy yordam oladi. Gaz, elektr va ko‘mir xarajatlari uchun beriladigan kompensatsiyalar muddati ham uzaytirilmoqda.
1 million so‘m kimlarga beriladi?
Prezidentning 2026-yil 28-oktyabrdagi PF–236-sonli farmoniga ko‘ra, 2026–2027-yilgi isitish mavsumi uchun noyabr oyida ayrim ehtiyojmand oilalarga bir martalik 1 million so‘m ajratiladi.
Birinchi navbatda, bu yordam Ijtimoiy reyestrga kiritilgan oilalarga beriladi.
Reyestrda bo‘lmagan, ammo moddiy ahvoli og‘ir oilalar ham yordam olishi mumkin. Buning uchun “mahalla yettiligi” xulosasi talab etiladi.
Xususan, oilaning har bir a’zosiga to‘g‘ri keladigan o‘rtacha oylik daromad minimal iste’mol xarajatlarining ikki baravaridan oshmasa, oila yordam olish mezonlariga mos keladi.
Markaziy isitish tizimiga ulangan ko‘p qavatli uylarda yashovchi oilalar uchun ham alohida shartlar belgilangan. Bunday oilalarda jon boshiga daromad Qoraqalpog‘iston va viloyatlarda minimal iste’mol xarajatlarining ikki baravaridan, Toshkent shahrida esa uch baravaridan oshmasligi kerak.
Ayrim hollarda daromadi ushbu chegaradan yuqori bo‘lgan ehtiyojmand oilalarga ham yordam berilishi mumkin. Buning uchun tuman yoki shahar shtabining tegishli qarori bo‘lishi lozim.
Shuningdek, o‘zgalar parvarishiga muhtoj yolg‘iz yashovchilar, yolg‘iz keksalar, nogironligi bo‘lgan shaxslarning tegishli reyestriga kiritilgan fuqarolar hamda yetim yoki ota-ona qaramog‘idan mahrum bo‘lgan bolalar yashayotgan oilalar ham yordam oluvchilar qatoriga kiritilgan.
Moddiy yordam olish shartlari yengillashtirildi
Yangi farmon bilan ehtiyojmand oilalarni aniqlashda daromad bo‘yicha talablar ham o‘zgartirildi. Avval elektr va gaz uchun kompensatsiya olishda oilaning jon boshiga daromadi minimal iste’mol xarajatlarining 1,5 baravaridan oshmasligi kerak edi. Endi bu chegara ikki baravargacha oshirildi.
Ko‘mir sotib olish xarajatlarining bir qismini qoplash uchun yordam olishda ham daromad chegarasi minimal iste’mol xarajatlarining bir baravaridan ikki baravariga ko‘tarildi.
“Saxovat va ko‘mak” jamg‘armasi orqali kommunal to‘lovlarni qoplash, mavjud qarzdorlikni to‘lash yoki ko‘mir va boshqa yoqilg‘i mahsulotlarini xarid qilishda yordam olish uchun ham xuddi shunday o‘zgarish kiritildi.
Bu orqali daromadi avvalgi chegaradan biroz yuqori bo‘lgani sabab yordam ololmagan ayrim oilalar ham qo‘llab-quvvatlash dasturlaridan foydalanishi mumkin.
Gaz, elektr va ko‘mir uchun kompensatsiyalar qachongacha davom etadi?
Farmonda kommunal xarajatlar bo‘yicha yordam muddatlari ham uzaytirildi. Elektr energiyasi va tabiiy gaz iste’molida bazaviy me’yor doirasidagi tarif bilan undan ortiq iste’mol uchun belgilangan tarif o‘rtasidagi farqni qoplash dasturi 2028-yil 1-aprelgacha davom etadi. Ko‘mir xarajatlarining bir qismini qoplash uchun moddiy yordam berish muddati esa 2029-yil 1-yanvargacha uzaytirildi.
Shunday qilib, yangi tartib nafaqat noyabr oyida bir martalik 1 million so‘m olish imkoniyatini beradi, balki gaz, elektr va ko‘mir xarajatlarini qoplash bo‘yicha yordamdan foydalanishi mumkin bo‘lgan oilalar doirasini ham kengaytiradi.
