Noruda materiallarni qazib olish bo‘yicha moratoriy qo‘llangan hudud chegaralari belgilandi

“Noruda materiallarni qazib olishga moratoriy joriy etilgan suv havzalari hududlarining chegaralarini belgilash to‘g‘risida”gi qaror qabul qilindi.

Moratoriy nima?

Moratoriy — muayyan majburiyat va harakatlarning ijro etish muddatini hukumat tomonidan ma’lum vaqtga uzaytirish yoki to‘xtatib qo‘yishdir.

Moratoriy joriy etiladigan hududlar chegarasi tasdiqlandi

Qarorga ko‘ra, Chirchiq, Sirdaryo, Sangzor, Zarafshon, Norin, Qashqadaryo va Surxondaryo daryolari o‘zanlaridagi noruda materiallari qazib olishga muddatsiz moratoriy joriy etiladigan hududlar chegaralari tasdiqlandi. Bunda moratoriy tatbiq etiladigan daryolar hududlari chegaralariga daryo o‘zanlari, ularning sohilbo‘yi mintaqalari va suvni muhofaza qilish zonalari kiradi. Tegishli tashkilot va hokimliklar daryolarning moratoriy tatbiq etilishi belgilangan hududlarida daryo o‘zanlarini tozalash va noruda materiallarini qazib olish ishlari to‘xtatilishini qat’iy nazoratga oladi.

Nazorat kuchaytiriladi

Daryo o‘zani, sohilbo‘yi mintaqalari va suvni muhofaza qilish zonalarida noruda materiallarini noqonuniy qazib olishning oldini olish bo‘yicha nazorat tadbirlarini kuchaytiriladi hamda joriy qilingan moratoriyni buzishga oid huquqbuzarlik holatlari yuzasidan qonunchilikda belgilangan tartibda choralar ko‘rilishini ta’minlaydi.

Ushbu hududlardagi tadbirkorlar ahvoli qanday bo‘ladi?

Daryolarning moratoriy tatbiq etilishi belgilangan hududlarida joylashgan qum-shag‘al qazib oluvchi hamda qayta ishlovchi tadbirkorlar tog‘ va tog‘oldi hududlarga yoki ushbu hududlarning yaqinida joylashgan kichik sanoat zonalariga ko‘chirish choralari ko‘riladi. Ko‘chirilayotgan tadbirkorlarga noruda materiallarini o‘z ichiga olgan yer qa’ri uchastkalaridan foydalanish huquqi “E-auksion” orqali rasmiylashtirib beriladi.