2024-yil 13-sentyabrning eng muhim voqealari dayjesti

Хorijiy mamlakatlardan olib kelingan turist uchun rag‘batlantiruvchi subsidiyalar berish tartibi tasdiqlandi

Turoperatorlar tomonidan turistik oqim past bo‘lgan xorijiy mamlakatlardan olib kelingan har bir turist uchun rag‘batlantiruvchi subsidiyalar beriladi.

Tanlovning maqsadi - Turoperatorlarni qo‘llab quvvatlash va ularni O‘zbekiston Respublikasiga turistlarni jalb qilish harajatlarini bir qismini qoplash orqali rag‘batlantirishdan iboratdir.

Turistik mahsulotlarni shakllantirish, ilgari surish va realizatsiya qilish yuzasidan turistik faoliyat bilan shug‘ullanadigan yuridik shaxs — O‘zbekiston Respublikasi rezidentilariga 2024-yil 1-yanvardan boshlab 2026-yil 31-dekabrgacha ajratiladi.

Sun’iy intellekt masalasi muhokama qilindi

Markaziy Osiyo sun’iy intellekt assotsiatsiyasi (AICA) tomonidan sun’iy intellekt texnologiyasini keng joriy etish bo‘yicha davra suhbati bo‘lib o‘tdi.

Unda Raqamli texnologiyalar vaziri birinchi o‘rinbosari Oleg Pekos, Markaziy bank, yetakchi banklar vakillari shuningdek, AICA rezidentlari ishtirok etdi.

Yig‘ilishda tijorat banklari tomonidan sun’iy intellekt texnologiyasi qo‘llanilgan tizimlar va ular yordamida erishilgan natijalar bo‘yicha ma’lumotlar taqdim etildi. Raqamli texnologiyalar vazirligining ushbu sohada 2030 yilga qadar ustuvor maqsadlari to‘g‘risida taqdimot o‘tkazildi.

Shaxmat olimpiadasining 3-turidagi raqiblarimiz ma’lum

13 sentyabr kuni Vengriya poytaxti Budapesht shahrida davom etayotgan 45-Butunjahon shaxmat Olimpiadasining 3-tur o‘yinlari bo‘lib o‘tadi.

Jahonning eng nomdor shaxmat jamoalari ishtirok etayotgan olimpiadaning 3-turida O‘zbekiston erkaklar terma jamoasi Xorvatiya terma jamoasi bilan, qizlarimiz esa Vengriya terma jamoasi bilan kuch sinashadi.

O‘zbek filmining xalqaro e’tirofi

6-11 sentyabr kunlari Tatariston Respublikasi poytaxtida Qozon xalqaro “Oltin minbar” festivali bo‘lib o‘tdi.

Unda dunyoning turli davlatlarida yaratilgan 140 dan ortiq filmlar namoyish etildi.  

Badiiy filmlar tanlovida o‘zbekistonlik rejissyor Yolqin To‘ychiyevning “Evrilish” filmi bilan ishtirok etdi.  

Xalqaro festivalning "To‘liq metrajli badiiy filmdagi eng yaxshi aktyor" yo‘nalishida “Evrilish” (O‘zbekiston) filmidagi roli uchun O‘lmas O‘rayev g‘olib bo‘ldi.