2024-yil 6-oktyabrning eng muhim voqealari

BMT bilan atrof-muhitni muhofaza qilish sohasidagi hamkorlik mustahkamlanmoqda

3-oktyabr kuni Ekologiya, atrof-muhitni muhofaza qilish va iqlim o‘zgarishi vazirligida Ekologiya vaziri Aziz Abduhakimov hamda Birlashgan Millatlar Tashkilotining Savdo va taraqqiyot konferensiyasi (UNCTAD) Bosh kotibi Rebeka Grinspan o‘rtasida uchrashuv bo‘lib o‘tdi.

Uchrashuv avvalida Aziz Abduhakimov Bosh kotibni Ijodiy iqtisodiyot bo‘yicha Butunjahon konferensiyasi muvaffaqiyatli o‘tkazilgani bilan tabriklab, hamkorlikni mustahkamlash borasidagi ijodiy iqtisodiyot sohasidagi kelgusi faoliyatida muvaffaqiyatlar tiladi. Vazir, shuningdek, vazirlik tomonidan cho‘llanish, o‘rmonlarni ko‘paytirish, tabiiy resurslarni tiklash, chiqindilarni qayta ishlash, shuningdek, iqlim o‘zgarishiga qarshi kurashish bo‘yicha faol ish olib borilayotganini ta’kidladi.

“Millat fidoiylari” – qatag’on qurbonlari haqidagi hujjatli filmlar namoyishi bo’lib o’tdi 

Milliy kino san’ati saroyida jadid bobolarimiz xotirasiga bag’ishlangan “Millat fidoiylari” filmlar namoyishi bo‘lib o‘tdi. Tadbirda oʻzbek romanchiligining asoschisi, maʼrifatparvar, adabiyotimizning haqli ravishda iftixori, hayot mazmunini oʻziga, oʻzligiga sodiq qolish deb bilgan, butun kuch va gʻayratini, salohiyatini millatga, jamiyatga, adabiyotga, oʻzbek tilini yuksalishiga bagʻishlagan atoqli adiblar, mash’um qatagʻon qurbonlari hayoti haqida hikoya qiluvchi Husan Rashidovning “Cho‘lpon qush esdaligi”, Umid Hamdamovning “Abdulla Qodiriy”, Ibrohim Ahmedovning “Mahmudxo‘ja Behbudiy” hujjatli filmlari namoyish etildi.

Shaxmat: Abdusattorov jamoasi peshqadam, Sindorov jamoasi esa keyingi o‘rinda

Londonda umumiy mukofot jamg‘armasi 1 million AQSH dollaridan iborat “Global Chess League “Tech Mahindra” turnirining ikkinchi tur musobaqalari davom etmoqda.

Ortda qolgan uchinchi kungi bahslar sarhisobiga ko‘ra, Nodirbek Abdusattorov dona surayotgan “PBG Alaskan Knights” jamoasi 12 ochko bilan yakka peshqadamga aylanib olgan vaziyatda Sindorovning “Triveni Continental Kings” jamoasi 6 ochko bilan 2-o‘rinda bormoqda.

Farmatsevtika mahsulotlarining postmarketing nazorati amaliyotga joriy etiladi

Ushbu amaliyot 2025-yilning 1-yanvaridan amalda qo‘llaniladi.

O‘zbekiston Respublikasi Vazirlar Mahkamasining 2024-yil 4-oktyabrdagi 628-son qarori bilan “Farmatsevtika mahsulotlarining postmarketing nazoratini amalga oshirish tartibi to‘g‘risida”gi nizom tasdiqlandi.

Ushbu Nizom O‘zbekiston Respublikasida muomalada bo‘lgan farmatsevtika mahsulotlarining farmatsevtika faoliyatini texnik jihatdan tartibga solish sohasidagi normativ hujjatlarga muvofiqligini aniqlash bo‘yicha postmarketing nazoratini amalga oshirish tartibini belgilaydi.