Paralimpiya: Kechagi o‘tgan bahslarda delegatsiyamiz a’zolari 6 ta medalni qo‘lga kiritishdi

Kechagi o‘tgan bahs natijalari bo‘yicha sportchilarimiz turli yo‘nalishlarda 6 ta medal qo‘lga kiritishdi va delegatsiya hisobidagi medallar hozirgacha 9 ta oltin, 8 ta kumush va 6 ta bronzaga yetdi. Hozirda O‘zbekiston jamoasi jami 23 ta medal bilan umumjamoa hisobida 12-o‘rinni qayd etib turibdi. Aytish mumkinki, bu O‘zbekiston delegatsiyasining Paralimpiya o‘yinlaridagi eng yaxshi natijasidir.

Safiya Burxanova kumush medal sovrindori

Para yengil atletika bo‘yicha ayollar o‘rtasida F12 klassida yadro uloqtirish bahslari yakuni bo‘yicha hamyurtimiz Safiya Burxanova 14.12 metr natija ko‘rsatib, delegatsiyamiz hisobiga oltinchi kumush medalni qo‘shib qo‘ydi. Ma’lumot uchun, Safiya Burxanova bundan avval Rio-2016 Paralimpiya o‘yinlarida kumush va Tokio-2020 Paralimpiya o‘yinlarida oltin medalni qo‘lga kiritgan.

Tolibboy Yo‘ldoshev oltin medalni qo‘lga kiritdi

Para yengil atletika bo‘yicha erkaklar o‘rtasida F37 klassida disk uloqtirish dasturida final bahsi yakunlariga ko‘ra ushbu yo‘nalishda ishtirok etgan o‘zbekistonlik Tolibboy Yo‘ldashev 57.28 metr natija qayd etgan holda delegatsiya hisobiga navbatdagi oltin medalni qo‘shib qo‘ydi. Ushbu dasturda qatnashgan yana bir o‘zbekistonlik Qudratullaxon Ma’rufxo‘jayev esa 46.79 metr natija bilan 9-o‘rinni band etdi.

Yana bir bronza sohibi

Paralimpiada bahslari yakunlanishiga ikki kun qolganida para yengil atletikachi Temurbek G‘iyosov o‘z nomini Parij-2024 yozgi Paralimpiya o‘yinlarining sovrindorlari qatoriga qo‘shib qo‘ydi.

U T64 klassida balandlikka sakrash dasturida ishtirok etib, 2.03 metr natija bilan bronza medaliga sazovor bo‘ldi.

Kumush Xo‘jayevadan kumush medal

Para dzyudo bahslarida o‘zbekistonlik Kumush Xo‘jayeva final bahsini o‘tkazish uchun tatamiga chiqdi. Finalda Xo‘jayeva yaponiyalik Xirose Junkoga qarshi kurash olib bordi. Ayollar o‘rtasida J2 klassida -57 kg vazn toifasida kechgan final bellashuvida O‘zbekiston sharafini himoya qilgan Kumush Xo‘jayeva mag‘lubiyatga uchradi va Paralimpiadaning kumush medalini qo‘lga kiritdi.

6-bronza

Para dzyudo bahslarida yana bir yurtdoshimiz Uchqun Quronboyev bronza medal uchun tatamiga chiqdi. Erkaklar o‘rtasida J2 klassida -73 kg vazn toifasida bahs olib borgan Quronboyev bronza medal uchun kechgan bellashuvda Kim Dongunga qarshi kurash olib bordi va delegatsiya hisobiga navbatdagi bronza medalni qo‘shib qo‘ydi.

15 yoshli paralimpiadachidan kumush medal

Para yengil atletika bahslarida yana bir o‘zbekistonlik sportchi kumush medalni qo‘lga kiritdi. Ayollar o‘rtasida F46 klassida nayza uloqtirish dasturining final bellashuvida qatnashgan Shahina Yigitaliyeva 43,12 metr bilan ikkinchi o‘rinni band qildi va delegatsiyani medallar soni bo‘yicha yana oldinga olib chiqdi.

10-kun dasturi

7-sentyabr, bugun ishtirok etadigan sportchilarimiz ro‘yxati bilan tarnishing:

12:30 G‘olibbek Mirzayorov

para velosport C1-3 | erkaklar | shosse

12:30 Turg‘un Abdiyev

para dzyudo J1 | erkaklar | -90 kg

12:30 Davurxon Karomatov

para dzyudo J2 | erkaklar | -90 kg

12:30 Feruza Ergasheva

para dzyudo J1 | ayollar | +70 kg

13:00 Doniyor Axmedov

para yengil atletika T13 | erkaklar | uzunlikka sakrash

13:07 Nurxon Qurbonova

para yengil atletika F54 | ayollar | nayza uloqtirish

13:14 Azizbek Abdulhabibov

para kanoe KL2 | erkaklar | 200 m.

13:28 Irodaxon Rustamova

para kanoe UL2 | ayollar | 200 m.

13:42 Xasan Qo‘ldashev

para kanoe KL3 | erkaklar | 200 m.

13:47 Dmitriy Xorlin

para suzish S12 | erkaklar | 100 m. batterflay

13:49 Shahzoda Mamadaliyeva

para kanoe UL3 | ayollar | 200 m.

15:00 Ro‘za Kuziyeva

para powerlifting | ayollar | -73 kg

16:35 Xusniddin Usmonov

para powerlifting | erkaklar | -88 kg

23:20 Muhammad Rixsimov

para yengil atletika F63 | erkaklar | yadro uloqtirish

00:00 Ma’rufjon Murodulloyev

para yengil atletika T47 | erkaklar | 400 m. yugurish