Paradzyudochi Sherzod Namozov 2 karra, para yengil atletikachi Xusniddin Norbekov esa 3 karra Paralimpiya o‘yinlari g‘olibiga aylandi

O‘yinlarning 9-kuniga kelib delegatsiyamiz hisobida 8 ta oltin, 5 ta kumush, 4 ta bronza bilan medallar jadvalining 12-pog‘onasini band etib turibdi.

Sherzod Namozov — 2 karra Paralimpiya o‘yinlari chempioni

O‘zbekiston delegatsiyasi a’zosi, paradzyudochi Sherzod Namozov Parij Paralimpiadasi g‘olibi bo‘ldi. 5-sentyabr kuni erkaklar o‘rtasida J2 klassida (ko‘zi qisman ko‘radigan sportchilar bellashadi) -60 kg vazn toifasida final bahsi yakunlandi. Oltin medal uchun kechgan kurashda o‘zbekistonlik Sherzod Namozov gruziyalik Zurab Zurabianiga qarshi tatamiga chiqdi va g‘alabaga erishib, oltin medalni qo‘lga kiritdi. U bu orqali ikki karra Paralimpiya o‘yinlari g‘olibi bo‘ldi. Sportchi 2016-yilgi Paralimpiya o‘yinlarida ham chempion bo‘lgan. Sherzod Namozov turnir chorak finalida ispaniyalik Luis Gavilanni, yarimfinalda esa janubiy koreyalik Li Min-Jayni mag‘lub etgandi. Ikkala bahs ham 10:0 hisobida yakunlangan.

Xusniddin Norbekov — 3 karra Paralimpiya o‘yinlari g‘olibi

Para yengil atletikachi Xusniddin Norbekov yadro uloqtirish bahslarida turnir rekordini o‘rnatib, Paralimpiada oltin medalini qo‘lga kiritdi. Shu tariqa u uchta Paralimpiya o‘yinlari g‘olibi bo‘lgan ilk o‘zbekistonlik sportchi bo‘ldi. 6-sentyabrga o‘tar kechasi para yengil atletika bo‘yicha erkaklar o‘rtasida F35 klassida (harakati va oyoqlarning muvofiqlashuvida o‘rta darajada nuqsoni bor sportchilar ishtirok etadi) yadro uloqtirish musobaqasi yakunlandi. Xusniddin Norbekov ikkinchi urinishda 16,82 metr natija qayd etib, Paralimpiya o‘yinlari rekordini yangiladi. Bundan avvalgi rekord 2008-yil Pekinda bo‘lib o‘tgan Paralimpiya o‘yinlarida xitoylik Guo Vey tomonidan o‘rnatilgan edi. O‘shanda xitoylik sportchi 16.22 metr natija qayd etgan. Musobaqada kumush medalni argentinalik Hernan Urra (16,11 m), bronza medalini esa eronlik Said Aliasgar Javanmardi (15,84) qo‘lga kiritdi. Ma’lumot uchun, Xusniddin Norbekov bundan avval Rio-2016 va Tokio-2020 yozgi Paralimpiya o‘yinlarida ham oltin medalni qo‘lga kiritgan. Unda, shuningdek, bitta bronza ham bor.

Bu orqali O‘zbekiston hisobidagi medallar soni 17 taga yetdi. Delegatsiya hisobida 8 ta oltin, 5 ta kumush, 4 ta bronza bilan medallar jadvalining 12-pog‘onasini band etib turibdi.

Bugungi kun dasturi

6-sentyabr, bugun  Parij-2024 yozgi Paralimpiya o‘yinlarida 22 ta sportchimiz qatnashadi. Ularning ro‘yxati va o‘yinlar vaqti bilan tanishing:

Para velosport

12:30 Azimbek Abdullayev, C4 | erkaklar | velosport poygasi

Para dzyudo

13:00 Shoxrux Mamedov, J1 | erkaklar | -73 kg

13:00 Kumushxon Xodjayeva, J2 | ayollar | -57kg

13:00 Uchqun Quranbayev, J2 | erkaklar | -73kg

Para yengil atletika

13:04. Safiya Burhonova, F12 | ayollar | yadro uloqtirish

13:17 Marufjon Murodullayev, T47 | erkaklar| 400m yugurish

13:49 Temurbek Giyazov, T64 | uzunlikka sakrash

14:58 Qudratilloxon Marufxojayev, , erkaklar | disk uloqtirish

14:58 Tolibboy Yuldashev, erkaklar | disk uloqtirish

Para kanoe

13:10 Azizbek Abdulhabibov, erkaklar | 200m ga

13:20 Irodaxon Rustamova, ayollar | 200m ga

13:30 Shahzoda Mamadaliyeva, ayollar | 200m ga

13:40 Hasan Kuldashev, erkaklar | 200m ga

13:55 Shaxnoza Mirzayeva, KL3 | ayollar | 200m ga

15:05 Haytmurod Sherquziyev, VL3 | erkaklar | 200m ga

Para og‘ir atletika

15:00 Bekzod Jamilov, 72kg

16:35 Ruxshona O‘ktamova, para paverlifting, 61kg

22:00 Qudratoy Toshpo‘latova, para paverlifting, 67kg

Para yengil atletika

22:00 Shahina Yigitaliyeva, F46 | ayollar | nayza uloqtirish

22:00 Roziyaxon Ergasheva, F46 | ayollar | nayza uloqtirish

22:04 Yorqinbek Odilov, F57 | erkaklar | yadro uloqtirish

23:37 Izzat Turg‘unov, T36 | erkaklar | 100m ga yugurish