“Oy” yili: Bir haftadan keyin “ikkinchi Oy” paydo bo‘lishi kutilmoqda

Astronomlar Yerga 2024 PT5 asteroidi yaqinlashayotganini aniqlashdi. Ushbu tadqiqot The Research Notes of the AAS jurnalida e’lon qilindi.

Asteroid ikkinchi tabiiy yo‘ldoshga aylanadi

Asteroid sayyoramiz atrofida 29-sentyabrdan 26-noyabrgacha aylanib, o‘ziga xos “kichik Oy” yoki ikkinchi tabiiy yo‘ldoshga aylanadi.

Maqola mualliflaridan biri Karlos de la Fuente Markos tushuntirishicha, fazoviy jism Yerga (4,5 mln. kilometrgacha) yaqin masofaga kelsa va 3 540 km/soat atrofidagi sekin tezlikka ega bo‘lsa shunday hodisa yuz beradi.

Bunday sharoitda fazoviy ob’yektning geotsentrik energiyasi manfiyga aylanib, vaqtincha Yerga bog‘lanib qoladi.

“Super oy”

Bundan oldin mutaxassislar 2024-yil eng ajoyib astronomik hodisalardan biri ro‘y berishi haqida ma’lum qilishgan edi. Unga ko‘ra, bu yil 19-avgust, 17-sentyabr, 17-oktyabr va 15-noyabr kunlari super Oy hodisasi ro‘y berishi kutilgan, ammo birinchi super Oy o‘zgacha bo‘lishi ta’kidlangan.

Ma’lumot uchun, birinchi super Oy hodisasi 19-avgust sanasida bo‘lib o‘tdi va uning rasmi ijtimoiy tarmoqlarda tarqadi.