Kontrakt pulini to‘lash muddatlari va super-kontrakt bo’yicha qo’shimcha tartiblar belgilandi

Bundan tashqari super-kontrakt asosida tanlov imkoniyati ham kengaymoqda.

Kontrakt to’lash muddati

2024/2025-o‘quv yilidan boshlab davlat oliy ta’lim muassasalariga to‘lov-kontrakt asosida talabalikka tavsiya etilgan abituriyentlar hamda tahsil olayotgan talabalar uchun kontrakt to‘lovlari muddatlari belgilandi. Bu haqda Oliy ta’lim, fan va innovatsiyalar vazirligi matbuot xizmati xabar berdi.

Xususan, belgilangan to‘lov miqdorining kamida 25%i talabalikka tavsiya etilgan abituriyentlar uchun 2024-yilning 15-sentabrigacha yoki O‘zbekiston ta’lim tashkilotlariga qabul qilish bo‘yicha davlat komissiyasi tomonidan belgilangan muddatgacha amalga oshirilishi kerak.

Yuqori kurslar uchun

Ikkinchi va undan yuqori kurs talabalari uchun 1-oktabrgacha yoki oliy ta’lim muassasasi rektori (direktori) tomonidan uzaytiriladigan muddatgacha blegilandi.

Shuningdek, to‘lov miqdorining kamida 50%ini 2025-yilning 1-yanvarigacha, 75%ini — 1-martgacha hamda 100%ini 1-maygacha yoki OTM rektori (direktori) tomonidan uzaytiriladigan muddatgacha to‘lash zarur.

Bunda, mazkur tartib moliyaviy mustaqillik berilgan davlat oliy ta’lim muassasalari uchun tavsiyaviy xarakterga ega ekanligi qayd etilgan.

Super-kontrakt tanlovi

Endi qabul jarayonida ikkinchi-beshinchi yo‘nalishga grant yoki kontrakt asosida kirgan talabalar o‘z xohishlari bilan ustuvorligi bo‘yicha tanlagan birinchi yo‘nalishida super-kontraktda o‘qishlari mumkin. O‘qishga kira olmagan abituriyentlar ham super-kontrakt asosida qabul qilinadi.

Davlat komissiyasi bayoniga ko‘ra, kirish imtihonlari natijasi bo‘yicha tanlovda ikkinchi-beshinchi bakalavriat ta’lim yo‘nalishlaridan birida grant yoki kontrakt asosida talabalikka tavsiya etilgan abituriyentlarga o‘z xohishlariga ko‘ra, ustuvorligi bo‘yicha tanlagan birinchi bakalavriat ta’lim yo‘nalishida super-kontraktda o‘qishga ruxsat berildi.

Bu qanday hollarda ishlaydi?

Bunda abituriyent to‘plagan bali birinchi ta’lim yo‘nalishida to‘lov-kontrakt asosidagi o‘tish balidan past bo‘lishi lozim. Kontrakt summasini hisoblash super-kontrakt qiymatining minimal miqdorlari asosida amalga oshiriladi.

Shuningdek, tanlagan barcha yo‘nalishlarga o‘qishga tavsiya etilmagan abituriyentlar ro‘yxatdan o‘tishda tanlagan yo‘nalishlaridan birida super-kontrakt asosida o‘qishlari mumkin.

Bunda, OTMlar tanlov bo‘yicha birinchi bakalavriat ta’lim yo‘nalishida e’lon qilingan test sinovlari natijalariga ko‘ra, abituriyentlarning to‘plagan balini asos qilib, ularning arizalariga muvofiq talabalikka qabul qiladi. Talabgorlarning to‘plagan ballari qat’iy ketma-ketligiga rioya etiladi.

To’lovning eng past qiymati

Super-kontraktning bir yillik o‘qitish qiymatidan kamida 50%i miqdoridagi to‘lovlarni amalga oshirgan abituriyentlar talabalar safiga qabul qilinadi. Super-kontraktni 15-oktabrga 100% to‘laganlarga 10% chegirma beriladi.