Rahbar kadrlarni baholash markazi tashkil etiladi
Hukumat qaroriga koʻra, endilikda rahbarlik lavozimiga nomzodlar orasida umumiy kasbiy bilimi, qadriyatlari va aqliy salohiyatini aniqlash bo‘yicha test sinovlari hamda psixologik so‘rovnomalar o‘tkaziladi.
2 daqiqa o‘qiladi
“Rahbar kadrlarni baholash markazini tashkil etish to‘g‘risida”gi Hukumat Qarori (629-son, 04.10.2024 y.) qabul qilindi. Bu haqda Adliya vazirligining Huquqiy axborot Telegram kanali xabar bermoqda.
Markazning asosiy vazifalari
Qarorga ko‘ra, Davlat xizmatini rivojlantirish agentligi muassisligida Rahbar kadrlarni baholash markazi tashkil etiladi.
Quyidagilar Markazning asosiy vazifalari etib belgilandi:
— ijtimoiy-psixologik tadqiqotlar asosida davlat fuqarolik xizmatchilari uchun bazaviy, alohida lavozim yoki lavozimlar guruhi uchun kompetensiyalar modeli hamda indikatorlarini ishlab chiqish;
— davlat fuqarolik xizmatchilarini shaxsiy-professional diagnostika qilish, kompetensiyalar modeli asosida kompleks baholash;
— kompetensiyalarni baholash jarayonida foydalanish uchun doimiy ravishda yangi uslublarni ishlab chiqish, o‘zlashtirish va joriy qilish;
— kompetensiyalarni baholash natijalari asosida rahbar kadrlar uchun shaxsiy-professional rivojlanish trayektoriyasini ishlab chiqish va zamonaviy texnologiyalardan foydalangan holda amalga oshirish.
Rahbarlikka nomzodlarni test qilish tizimi
Bundan tashqari:
— rahbarlik lavozimiga nomzodlarni umumiy kasbiy bilimi, qadriyatlari va aqliy salohiyatini aniqlash bo‘yicha test sinovlarini hamda psixologik so‘rovnomalar o‘tkazish;
— rahbar kadrlar faoliyati samaradorligini baholash va monitoring qilish, kadrlarga bo‘lgan ehtiyojni prognoz qilish, ularni saralab olish va joy-joyiga qo‘yish jarayonlariga raqamli texnologiyalarini va zamonaviy usullarni keng joriy etish;
— faoliyatining asosiy yo‘nalishlari bo‘yicha ekspert-tahliliy faoliyat, ilmiy tadqiqot va izlanishlarni olib borish ham Markazning asosiy vazifalaridan etib belgilandi
