Yangi yil bayramida poytaxt avtobuslari qanday ishlaydi?
“Toshshahartransxizmat” matbuot xizmati Yangi yil bayramidagi dam olish kunlari Toshkentda avtobus yoʻnalishlari qaysi jadval asosida harakatlanishini ma’lum qildi.
1 daqiqa o‘qiladi
“Toshshahartransxizmat” AJ axborot xizmati Yangi yil bayramidagi dam olish kunlari poytaxtda avtobus yoʻnalishlari qay jadval asosida harakatlanishini ma’lum qildi. Jadval O‘zbekiston Respublikasi Prezidentining 2023-yil 22-dekabrdagi “2024-yilda rasmiy sanalarni nishonlash davrida qoʻshimcha ishlanmaydigan kunlarni belgilash va dam olish kunlarini koʻchirish toʻgʻrisida”gi PF-213-son Farmoniga asosan ishlab chiqilgan.
Dam olish kunlari jadvali
Ta’kidlanishicha, dam olish kunlari avtobus saroylariga biriktirilgan avtobus yoʻnalishlari quyidagi jadval boʻyicha harakatlanadi:
- 2024-yil 14-dekabr, shanba — ish kuni. Ish kunlari uchun tasdiqlangan jadvallar asosida;
- 2024-yil 30-dekabr, dushanba — dam olish kuni. Yakshanba kunlari uchun tasdiqlangan jadvallar asosida;
- 2024-yil 31-dekabr, seshanba — dam olish kuni. Yakshanba kunlari uchun tasdiqlangan jadvallar asosida.
Chegirmalar, qo‘shimcha qatnov
Avvalroq, “Uzbekistan Airways” talabalar uchun 50 % chegirma e’lon qilgani haqida xabar bergan edik. Chegirma joriy yilning 23-dekabridan boshlab, kelasi yilning 7-yanvarigacha bo‘lgan aviaqatnovlar uchun amal qiladi.
Bundan tashqari, 15-dekabrdan Toshkentdan Samarqandga qo‘shimcha “Afrosiyob” poyezdi yo‘lga qo‘yiladi. Qatnovlar 15−31 dekabr hamda 3−12 yanvar kunlari oralig‘ida haftaning juma, shanba va yakshanba kunlari amalga oshiriladi.
