Markaziy Osiyoning “yashil rivojlanish” konsepsiyasi ishlab chiqilmoqda — Saida Mirziyoyeva

Samarqand shahrida Markaziy Osiyo Iqlim forumi bo‘lib o‘tmoqda. Forum doirasida iqlim o‘zgarishiga qarshi kurash va mintaqaning yashil rivojlanishini ta’minlashga qaratilgan strategik tashabbuslar muhokama qilinmoqda.

Prezident yordamchisi Saida Mirziyoyevaning ta’kidlashicha, Markaziy Osiyo tabiiy omillarga eng ta’sirchan mintaqalardan biri bo‘lib, so‘nggi 70 yil ichida bu yerda harorat 1,5–2°C ga oshgan. Orol fojiasi esa global ekologik inqiroz ramziga aylangan.

Saida Mirziyoyeva Prezident Shavkat Mirziyoyev tashabbusi bilan “Markaziy Osiyoning yashil rivojlanish” konsepsiyasi ishlab chiqilayotganini alohida qayd etdi. Unga ko‘ra, bu konsepsiya yashil texnologiyalardan tortib, barqaror urbanizatsiyaga qadar barcha sohalarni qamrab oladi va ushbu hujjat COP30 forumida qabul qilinishiga umid bildirdi.

“Orolbo‘yi va Qoraqalpog‘istonni rivojlantirish shaxsan men uchun ustuvor vazifadir. Bu borada biz ekologiya, infratuzilma va madaniy tiklanish yo‘nalishlarida ishlayapmiz. Ertaga Nukusda ochilishi bo‘lib o‘tadigan Orol madaniyat sammiti ham fan, san’at va jamiyat o‘rtasida o‘ziga xos muloqot maydoniga aylanishi kutilmoqda. Biz muloqot va hamkorlikka ochiqmiz. Faqat birgalikda biz Yer yuzini asrab qolishimiz va farzandlarimiz, nabiralarimiz hamda bizdan keyingi avlodlar uchun yaxshiroq kelajakni barpo etishimiz mumkin”, — dedi Prezident yordamchisi.

Shuningdek, Saida Mirziyoyeva ushbu forum doirasida Yevropa Kengashi Prezidenti Antoniu Koshta va Yevrokomissiya Prezidenti Ursula fon der Lyayen bilan tanishganidan mamnunligini bildirib, “Fon der Lyayen xonimning yetakchiligi va iqlim kun tartibini ilgari surishdagi izchil sa’y-harakatlari ilhom bag‘ishlaydi va samarali xalqaro hamkorlikka bo‘lgan ishonchni mustahkamlaydi”, — deya ta’kidladi.