Gazprom O‘zbekistonda yoqilg‘i quyish shoxobchalarini qurmoqchi
Shuningdek, kompaniya O‘zbekiston bilan uglevodorodlarni qidirish va qazib olishda texnologiya sohasida hamkorlikni davom ettirish niyatida.
2 daqiqa o‘qiladi
“Gazprom neft” O‘zbekistonda o‘z brendi ostida yoqilg‘i quyish shoxobchalari tarmog‘ini qurish imkoniyatlarini o‘rganmoqda. Bu haqda kompaniya rahbari Aleksandr Dyukovga tayanib “TACC” nashri xabar berdi.
Biz allaqachon O‘zbekistondamiz
— Biz allaqachon O‘zbekistonda ishlayapmiz, u yerga neft va neft mahsulotlari — benzin, dizel yoqilg‘isi, moylash va bitum materiallarini yetkazib beramiz, dedi Dyukov. – Endi biz O‘zbekistonda yana bir qancha loyihalarni amalga oshirish imkoniyatini, jumladan, o‘z brendimiz ostida yoqilg‘i quyish shoxobchalari tarmog‘ini qurish imkoniyatini muhokama qilmoqdamiz.
Dyukov O‘zbekistonda jadal iqtisodiy o‘sish va neft mahsulotlari iste’moli ortib borayotganini ta’kidladi.
“Bu istiqbolli bozor, unda bo‘lish, albatta, to‘g‘ri”, — deya qo‘shimcha qildi u.
Uglevodlarni qazib olish bo‘yicha ham hamkorlik davom etadi
Dyukovning ta’kidlashicha, kompaniya O‘zbekiston bilan uglevodorodlarni qidirish va qazib olishda texnologiya sohasida hamkorlikni davom ettirish niyatida.
“Raqamli yechimlarimizdan foydalanib, biz O‘zbekistonda burg‘ulashni boshqarish markazini ochishga yordam berdik, bu esa konlarda quduqlarni qurish vaqtini va narxini sezilarli darajada kamaytirish imkonini berdi”, — dedi u.
Gaz eksporti masalasi
Putinning bahordagi O‘zbekistonga bo‘lgan tashrifi chog‘ida 2025-yilda “Gazprom” kompaniyasi O‘zbekistonga tabiiy gaz yetkazib berish hajmini to‘rt barobarga oshirishi haqida gapirgan edi.
“Hozirgi kunda „Markaziy Osiyo — Markaz” quvurlari tizimining o‘tkazuvchanligini oshirish bo‘yicha ishlar olib borilmoqda, bu esa kelgusi yilda O‘zbekistonga keltiriladigan gaz hajmini 11 mlrd. kub metrgacha oshirish imkonini beradi”, — degan Putin.
