O‘zbekiston “Shohdengiz” loyihasiga qo‘shilishi mumkin

21-may kuni O‘zbekiston investitsiyalar, sanoat va savdo vaziri Laziz Qudratov Gubada bo‘lib o‘tgan Ozarbayjon-O‘zbekiston mintaqalararo II forumi doirasida jurnalistlar bilan suhbatlashdi.

"Shoh dengiz" loyihasida ulush asosida ishtirok etish

 Vazir “O‘zbekneftgaz” kompaniyasi Kaspiy dengizining Ozarbayjon shelfidagi “Shohdengiz” gaz kondensati loyihasiga kirishi mumkinligi haqida gapirdi.

"Biz SOCAR kompaniyasini taklif qilamiz va u bilan O‘zbekistondagi neft va gaz qazib olish loyihalarida ishtirok etishi haqida gaplashamiz. Ozarbayjonda mavjud “Shohdengiz” loyihasida ulush asosida ishtirok etish muzokaralar mavzusidir", - deya tushuntirdi u.

Loyihaga qo‘shilish bo‘yicha hujjat imzolanadi

Qudratov yaqin oylarda “O‘zbekneftgaz”ning “Shohdengiz”ga kirishi bo‘yicha hujjatlar imzolanishiga umid bildirdi.

"Bizning ushbu loyihadagi ishtirokimiz chet ellik maslahatchi ishtirokida jiddiy moliyaviy va huquqiy ekspertiza talab qiladi", - dedi u.

Gaz va kondensat qazib olish 2006-yilda boshlangan

“Shohdengiz” konida gaz va kondensat qazib olish 2006-yilning dekabrida boshlangan, deb yozadi “Interfaks”. Undan ko‘k yoqilg‘i shartnomalar asosida Gruziya, Turkiya, Italiya, Gretsiya, Bolgariya, Ruminiya, Vengriya va Serbiyaga yetkazib berilmoqda.

“Shohdengiz” ning zaxiralari 1,2 trillion kub metr 

“Shohdengiz” loyihasi 1996-yildan beri amalga oshirib kelinmoqda. 2013-yilda “Shohdengiz” konini o‘zlashtirish bo‘yicha kelishuv 2046-yilgacha uzaytirildi.

Hozirgi vaqtda loyiha ishtirokchilari bp (ishlab chiqarish operatori - 29,99 foiz), Lukoil (19,99 foiz), TPAO (19 foiz), NİKO (10 foiz), SGC Upstream (Ozarbayjon manfaatlarini ifodalaydi, 21,02 foiz) hisoblanadi.

“Shohdengiz”ning zaxiralari 1,2 trillion kub metr gaz atrofida baholangan, hozirgacha ushbu manbaning 20 foizga yaqini qazib olindi.