Қасос они яқин: Ўзбекистон Австралиядан “қора тарих” хунини ололадими? 

Бугун Ўзбекистон терма жамоаси Осий Кубогининг сўнгги, ҳал қилувчи тури доирасида азалий рақиб, Австралия терма жамоасига қарши майдонга тушади. Бу ўйин Ўзбекистон терма жамоаси учун муҳим аҳамиятга эга. Ғалаба учун гуруҳ ғолиблиги тикилган ўйин. 

Ўзаро ўйинлар тарихи 

Австралия ва Ўзбекистон термалари ўртасидаги ўзаро ўйинлар тарихига назар солган одам, Ўзбекистонга бир сония бўлса-да, ачиниб қўймаса, ҳисоб эмас. Бу жамоа билан, айнан, мана шу мусобақа билан боғлиқ ёмон тарихимиз мавжуд. Умид қиламизки, йигитларимз бугун ўша “қора тарих” бадалини тўлаттиришади. Ҳар ҳолда, энди бунга қодир таркибга эгамиз, “ресурсларимиз” етарли. Икки жамоа бугунга қадар 4 бора ўзаро тўқнаш келиб, уларнинг ҳаммасида рақибларимизнинг қўли баланд келган. Шундан иккитаси, Ўзбекистоннинг Осиё Кубогидаги плей-оффдаги ўйинларига тўғри келади. Ярим финал — 0:6 ва нимчорак финал — 1:1(4:3). Қолган икки ўйин Жаҳон Чемпионати саралаш босқичига тўғри келиб, бу ўйинларда ҳам термамиз минимал ҳисобларда имкониятни бой берган. 

Ўйиннинг рейтингга таъсири 

Ўзбекистон ва Австралия терма жамоалари ўртасидаги ўйиннинг натижасидан келиб чиқиб, терма жамоамиз FIFA рейтингида қуйидаги тартибда баллар ишлаб олиши ёки йўқотиши мумкин:

Ғалаба: +23.87

Дуранг: +6.37

Мағлубият: -11.13

Имкониятлар — (Ўзбекистон ғалабаси, дурранг, Австралия ғалабаси) 30%-40%-30%.

“Қора тарих” 

Юқорида ёзиб ўтганимиздек, жамоамизнинг Австралияга қарши “қора тарих”и бор. Тақдирни қарангки, Австралия терма жамоаси билан вакилларимиз, айнан, Қатарда бўлиб ўтган Осиё Кубогида, тарихдаги энг яхши натижамиз амалга оширилган ўйинда аламли мағлубиятга юз тутган — 0:6. Ҳа, ўша “қора тарих”лардан бири шу ўйин. Бундан ташқари, терма жамоамиз охирги Осиё Кубоги ўйинларида ҳам Австралияга тўқнаш келиб, плей-офф босқичининг дастлабки ўйинидаёқ пенальтилар сериясидаги мағлубият сабаб, мусобақани тарк этган эди. Бугун аввалги натижалар учун ҳисоб сўрайдиган вақт етиб келди.

Маълумот учун, сайтимизда гуруҳимиздаги барча жамоалар ҳақида таҳлилий мақолалар мавжуд. Бугунги рақибларимиз таркиби ва унинг имкониятлари ҳақида мана бу мақола орқали танишиб чиқишингиз мумкин.

Учрашув бироздан сўнг, Тошкент вақти билан соат 16:30 да “Ал-Жануб” стадионида старт олади.