Eshak “iste’mol go‘shti olinadigan hayvonlar” qatoriga qo‘shilmoqda(mi)?

Bugun Oliy Majlis Qonunchilik palatasining navbatdagi majlisida “Hayvonlarni identifikatsiya qilish, ro‘yxatga olish va kuzatish to‘g‘risida”gi qonun loyihasi birinchi o‘qishda ko‘rib chiqildi.

Bunda iste’mol uchun ishlatiladigan go‘sht va boshqa mahsulotlar olinadigan hayvonlar qatoriga eshak ham qo‘shilgan.

Hayvonlarni identifikatsiya qilish

Oliy Majlis Qonunchilik palatasida “Hayvonlarni identifikatsiya qilish, ro‘yxatga olish va kuzatish to‘g‘risida”gi qonun loyihasi birinchi o‘qishda ko‘rib chiqildi.

Qonun loyihasida chorva hayvonlarini identifikatsiya qilish bo‘yicha yagona davlat siyosatini yuritish, hayvonlarda yuqumli kasalliklarning oldi olish hamda mamlakatda oziq-ovqat mahsulotlari xavfsizligini ta’minlash masalalari nazarda tutilmoqda.

Qayd etilishicha, O‘zbekistonda hayvonlarni identifikatsiya qilish bo‘yicha Jahon bankidan 33 mln. dollar mablag‘ ajratilgan. 2024-2025-yillarda 25 ta tumanda, 2027-yil 1-yanvargacha barcha hududda chorva hayvonlari to‘liq identifikatsiya qilinadi.

Qonunda oziq-ovqat xavfsizligi

Qonun tashabbuskorlariga ko‘ra, hayvonlarni identifikatsiya qilish tizimining eng asosiy afzallik tomonlaridan biri, bu tizim orqali oziq-ovqat xavfsizligi ta’minlanadi.

Shu sababdan iste’mol uchun ishlatiladigan go‘sht va boshqa mahsulotlar olinadigan qoramol, qo‘y va echki, cho‘chqa, ot, eshak, tuya kabi hayvon turlari hamda ular uchun kasallik xavfini tug‘dirishi mumkin bo‘lgan hamda kasallik kirib kelishining oldini olish, epizotik osoyishtalikni ta’minlash maqsadida, it, mushuklar identifikatsiya qilinishi taklif etilmoqda.

Qo‘shimcha qilinishicha, qonunni qabul qilish orqali respublikada mavjud chorva mol bosh sonlari to‘g‘risida yagona elektron ma’lumotlar bazasi yaratiladi. Qolaversa, chorva hayvonlarini o‘ta xavfli yuqumli kasalliklarga davlat tomonidan bepul to‘liq profilaktik emlashga erishiladi. Shu hisobdan hayvonlar turli yuqumli kasalliklardan nobud bo‘lishining oldi olinadi.

Eshak go‘shti iste’mol go‘shti olinadigan hayvonlar qatorida

Qonun loyihasida iste’mol uchun ishlatiladigan go‘sht va boshqa mahsulotlar olinadigan hayvonlar qatoriga eshak ham qo‘shilgan bo‘lib, bu JST talablariga bog‘liq bo‘lishi mumkin.

Ma'lumot uchun, jahon bozorida eshak go‘shti iste’moldagi go‘sht hisoblanadi hamda undan turli oziq-ovqat mahsulotlari tayyorlanadi.

Qonun loyihasi deputatlar tomonidan birinchi o‘qishda qabul qilingan.