Prevyu: “Paxtakor” — “Ar-Rayyan”

Bugun, 5-noyabr kuni “Paxtakor” jamoasi Elit Chempionlar Ligasi 4-tur doirasida Qatarning “Ar-Rayyan” jamoasini qabul qiladi.

“Ar-Rayyan” jamoasi haqida

“Paxtakor” va “Ar-Rayyan” bugun o‘z tarixida ilk bor rasmiy uchrashuvda to‘qnash keladi. Ushbu jamoalar bunga qadar o‘zaro o‘yin o‘tkazmagan. “Ar-Rayyan” 8 karra Qatar chempioni bo‘lib, 6 bor Qatar Amiri Kubogi, 4 marta Qatar Kubogi va 5 marta Shayx Jassim Kubogi g‘olibiga aylangan. Oxirgi chempionligini 2015—16-yilgi mavsumda qo‘lga kiritgan. Jamoani mahalliy mutaxassis Yunus Ali boshqarib kelmoqda. Chempionlar Ligasi uchun “Ar-Rayyan” safida qatarlik o‘yinchilardan tashqari 12 nafar xorijlik futbolchi ro‘yxatdan o‘tkazilgan.

Qatar klublariga qarshi natijalar

“Sherlar” bunga qadar Qatarning boshqa jamoalari bilan xalqaro musobaqalarda faqatgina Chempionlar Ligasida o‘yin o‘tkazgan. “Paxtakor” Qatarning 5 klubiga qarshi jami 18 uchrashuvda maydonga tushgan. Ular orasida “Al Garafa” jamoasi bilan eng ko‘p duch kelingan — 6 bor. “Al Sadd" va “Al Duxayl" bilan to‘rt martadan, “Qatar” SK va “Al Arabi” bilan esa ikkitadan uchrashuv o‘tkazilgan. Bu o‘yinlarda klub o‘z hisobiga 5 g‘alaba, 5 durang va 8 mag‘lubiyat yozdirib qo‘ygan. Shuningdek, ushbu o‘yinlar statistikasidan raqiblar darvozalari 26 marta ishg‘ol qilingani hamda mamlakatimiz jamoasi darvozasidan 29 to‘p o‘tkazib yuborilgani o‘rin olgan.

Toshkentda o‘tkazilgan o‘yinlar 

Bugungi uchrashuv Toshkentda, “Jar” stadionida o‘tkaziladi. Bunga qadar poytaxt klubi Toshkentda Qatar jamoalariga qarshi yetti bellashuvda maydonga tushgan. Ularda 4 g‘alaba va 3 durang natijasi qayd etilgan. Shuningdek, 14 to‘p kiritilgan hamda 6 ta gol qo‘yib yuborilgan. Quyida ”Paxtakor” bilan to‘qnash kelgan Qatar klublari va natijalar aks etgan:

• “Al Garafa” - 3:0, 3:4, 2:2, 2:0, 0:1, 1:2
• “Qatar” SK - 1:0, 0:0
• “Al Sadd” - 1:1, 1:2, 2:2, 1:2
• “Al Arabi” - 3:1, 1:0
• “Duxayl” - 1:3, 2:2, 2:3, 0:3.

Ma'lumot uchun, uchrashuv Toshkent vaqi bilan 19:00 da start oladi. O'yin "Sport" telekanli orqali jonli namoyish etilishi rejalashtirilgan.