Energetika vaziri kelasi yildan gaz yetib bormagan uylarga elektr uchun pasaytirilgan narxlar qo‘llanishi haqida ma‘lum qildi

2025-yil boshigacha gaz yetib bormagan uylar uchun elektr iste’moliga pasaytiriluvchi narxlar qo‘llaniladi. Bu haqda Energetika vaziri Jo‘rabek Mirzamahmudov “Lolazor” podkastida ma’lum qilgan.

Imkoniyat bor-u, iste‘mol kam

Vazir elektr energiyasining bir oylik iste’moliga bazaviy me’yorning (200 kVt/soat) joriy etilishi, keyinchalik uning miqdorini oshirish uchun emas, balki, tahlillar, me’yorlar hamda iste’moldan kelib chiqib, o‘rganilgandan keyin kiritilgan norma ekanini qayd etdi.

“Tahlillarga ko‘ra, 60%dan ortiq iste’molchi bu normadan kam ishlatgan. Statistik ma’lumotlarda elektr energiyasini ishlab chiqarish pasayib ketdi, deb aytyapti. Nimaga pasayib ketdi? Generatsiya quvvat bor, lekin iste’mol kam. Haqiqatdan ham, abonentlar sonining oshishi bilan birga, may oyidan keyin iyun, iyul va avgust hamda sentabr oylarida iste’mol kam bo‘ldi”, — dedi vazir.

50% chegirma

Jo‘rabek Mirzamahmudov gazlashtirilmagan uy-joylarni kuz-qish mavsumida qo‘llab-quvvatlash maqsadida hisob-kitob ishlari olib borilayotganini ma’lum qildi. Bunda, nafaqat xonadonlar balki, ishlab chiqarish hamda maxsus iqtisodiy zonalar ham unga qamrab olinishi mumkin.

Vazir oldin generatsiya quvvatlari yetarli darajada bo‘lmaganini, endilikda uning yetarli darajada ekanligidan kelib chiqib, differensial tariflar ishlab chiqilishini qayd etdi. Bunda tabiiy gaz yetib bormagan, uylarini elektr energiyasi yordamida isituvchi iste’molchilar uchun 50% miqdorida chegirma qo‘llash rejalashtirilmoqda.

Qaror bo‘yicha ishlanmoqda

“Hozirda ko‘p qavatli uylar uchun bor bu chegirma. Gaz bilan ta’minlanmagan hovlilarga ham qo‘llash bo‘yicha topshiriq olganmiz. Hozir tegishli vazirliklar bilan qaror bo‘yicha ishlayapmiz. Nafaqat ularga (xonadonlarga), sanoat korxonalariga ham (qo‘llaniladi). Yuqori yuklanishli vaqtlar — kechki va ertalabki vaqtlarda oshiriluvchi koeffitsient bo‘lsa, qolgan paytlarda pasaytiriluvchi koeffitsient ishlatish (mumkin bo‘ladi). Ya’ni, 10%, 15%, 20%, 30%gacha”, — dedi Mirzamahmudov.

Shuningdek, vazir gazlashmagan hovlilar uchun kamaytiruvchi tariflarni qo‘llash yuzasidan Iqtisodiyot va moliya vazirligi bilan qaror bo‘yicha kelishib, hisob-kitobi olib borilayotganini bildirgan.

Elektromobillar uchun alohida tariflar

Energetika vaziri bunga misol sifatida elektromobillarni quvvatlash bo‘yicha topshiriq berilganini, ularning hisob-kitobi alohida qilinayotganini qayd etdi. Ya’ni, ularning quvvatlash vaqti uchun tariflar alohida belgilanadi. “Shundagina energiya tizimimizni me’yorida saqlab, muvofiqlashtira olamiz”, — dedi u. 

Iyul oyida elektromobillarni quvvatlash uskunalari uchun alohida hisoblagich o‘rnatish rejalashtirilayotgani ma’lum bo‘lgandi.

Qachon qaror kuchga kiradi?

“Agar mana shu oy (sentabr) yakunlasak, qarorni kiritamiz. Bunda ishlab chiqaruvchilarni ham inobatga olgan holda, (2025-yilning) 1-yanvaridan (joriy etishga) harakat qilamiz”, — deya qo‘shimcha qildi Mirzamahmudov.

Shuningdek, u elektr energiyasiga o‘rnatilgan ijtimoiy norma bo‘yicha muhokamalarni to‘xtatishga chaqirdi.