Afg‘onistonning yangi elchisi Toshkentga keldi
“Tolibon” tomonidan tayinlangan Afg‘onistonning yangi elchisi Abdul G‘affor Bahr 22-sentyabr kuni Toshkentga tashrif buyurdi.
1 daqiqa o‘qiladi
Bu haqda Ariana news xabar berdi.
Elchi kutib olindi
Abdul G‘affor Bahrni elchixonada ishonchli vakil sifatida rahbarlik qilgan Mo‘g‘furulloh Shahob va O‘zbekistonning Afg‘onistondagi elchisi vazifasini yakunlagan Yodgorxo‘ja Shodmonov kutib olgan.
Ushbu tayinlov Afg‘oniston diplomatiyasidagi yangi o‘zgarishlar va davlatlar o‘rtasidagi munosabatlarning kengayishidan dalolat beradi.
O‘zaro loyihalar
Elchi yaqinda ikki davlat o‘rtasida kelishilgan loyihalarni amalga oshirishga yordam beradi. U Afg‘onistonning Qandahor viloyatidan bo‘lib, muqaddam “Tolibon” hukumatining Oliy sudida tekshiruv va tadqiqot bo‘limi direktori bo‘lib ishlagan.
Vakillar
Fevral oyi boshida “Tolibon” kon va neft vazirining o‘g‘li Mo‘g‘furulloh Shahobni O‘zbekistonga elchi etib tayinlagan, u Toshkentga elchi qilib yuborilgan “Tolibon”ning rasman birinchi vakiliga aylangandi. Bu “Tolibon” yetakchisi Haybatulloh Oxundzoda amaldorlarga qarindoshlarini davlat muassasalariga ishga olishni taqiqlaganiga qaramay amalga oshgan.
Bundan oldin sobiq Afg‘oniston hukumatining vakili Ahmad Xolid Elimiy Toshkentda faoliyat yuritgan. Afg‘oniston hukumati qulashidan to “Tolibon” hukumati tomonidan Toshkentga birinchi elchi tayinlangunga qadar o‘tgan 2 yil davomida Elimiy “Tolibon” Tashqi ishlar vazirligi nazorati ostida ishlagan.
