O‘zbekistonda elektron tijorat bo‘yicha onlayn-maktab ish boshladi

O‘zbekistonda bepul elektron tijorat maktabi ish boshladi. Bu haqda Investitsiyalar, sanoat va savdo vazirligi xabar berdi.

Maktab nimani o‘rgatadi?

Elektron tijorat maktabi kichik va o‘rta biznes vakillariga digital-vositalar bilan ishlashni o‘rgatadi.

Maktab — kichik va o‘rta biznesni qo‘llab-quvvatlash uchun ishga tushirilgan notijorat loyihasi hisoblanadi.

Notijorat loyihasi “Mastercard” kompaniyasi tomonidan, O‘zbekiston Investitsiyalar, sanoat va savdo vazirligi ko‘magida amalga oshirilmoqda.

Biznesni kengaytirish imkoniyati va bepul ta‘lim

Ta’lim tadbirkorlarga digital-vositalar yordamida biznesni kengaytirish va o‘z ishlarida ko‘proq pul topish imkonini beradi.

Elektron tijorat onlayn-maktabi doirasida tadbirkorlar targetlangan reklamani ishga tushirish, ijtimoiy tarmoqlarda sahifa yuritish, internet-do‘kon ochish, xalqaro onlayn-maydonchalarda tovar sotish, onlayn-to‘lovlarni ulash va kiberxavfsizlikni ta’minlash kabi ko‘nikmalarga ega bo‘ladilar.

Maktab kurslarida istalgan kishi, mutlaqo bepul o‘qishi mumkin bo‘lib, mashg‘ulotlar o‘zbek va rus tillarida olib boriladi.