Endilikda banklardagi Call-markazlar kecha-yu kunduz ishlaydi

O‘zbekistondagi tijorat banklarining call-markazlari kartalarning yo‘qolishi yoki ulardan noto‘g‘ri foydalanish holatlari bo‘yicha murojaatlarni qabul qilish uchun kechayu kunduz ishlaydi. Bu haqda Markaziy bank matbuot xizmati xabar berdi.

Markaziy bank boshqaruvi qarori

O‘zbekiston Respublikasining “O‘zbekiston Respublikasining Markaziy banki to‘g‘risida”gi Qonuniga muvofiq Markaziy bank boshqaruvi “Bank xizmatlari iste’molchilari bilan o‘zaro munosabatlarni amalga oshirishda tijorat banklarining faoliyatiga qo‘yiladigan minimal talablar to‘g‘risidagi nizomga o‘zgartirish va qo‘shimcha kiritish haqida”gi qarorni qabul qildi.

Bank faoliyatidagi mas’uliyatni oshirishi kerak

Unga ko‘ra, tijorat banklari faoliyatiga kiritilgan o‘zgartirishlar iste’molchilar bilan munosabatlarni yaxshilashi, bank faoliyatidagi mas’uliyatni oshirishi kerak. Call-markaz operatorlari mijozning iltimosiga binoan, u kunning qaysi vaqtida aloqada bo‘lishidan qat’i nazar, kartani zudlik bilan blokirovka qilishlari shart.

Banklar, shuningdek, so‘rovlarni ko‘rib chiqish uchun ichki talablarning yangi ro‘yxatini ishlab chiqadi. U veb-saytga joylashtiriladi. U yerda barcha mijozlar so‘rovlarni qabul qilish va ro‘yxatdan o‘tkazish tartibi, ularni ko‘rib chiqish va javob berish muddatlarini topishlari mumkin bo‘ladi.

Tizimli muammolarni hal qilish masalasi

Bundan tashqari, banklardagi murojaatlarni ko‘rib chiqish bo‘yicha maxsus tuzilma tashkil etiladi, uning xodimlari barcha murojaatlarni atroflicha o‘rganadi va ularning hal etilishini tartibga soladi. Mijozlar o‘z murojaatlarini maxsus elektron tizimda ro‘yxatdan o‘tkazishlari mumkin bo‘ladi. U yerda tizimli muammolarni ham tahlil qilish mumkin bo‘ladi.

Qaror qachondan kuchga kiradi?

Banklar shikoyatlarni ko‘rib chiqish uchun ichki nazoratni ham tashkil qiladi. Bank rahbariyati muntazam ravishda kelib tushgan murojaat va so‘rovlarni tahlil qilib boradi. Shuningdek, ular bo‘yicha choraklik va yillik hisobotlarni tayyorlaydi. Tuzatishlar 2025-yil 17-yanvardan kuchga kiradi.