Toshkentdagi Bobur ko‘chasining bir qismida noyabr oyi o‘rtalariga qadar avtomobillar harakati qisman cheklanadi

Yakkasaroy tumanidagi Bobur ko‘chasining bir qismida avtomobillar harakati cheklanadi. Avtotransport oqimi bir oyga to‘rt chiziqli yo‘ldan faqat ikkitasiga yo‘naltiriladi. Bu paytda yer osti elektr uzatish kabel tarmoqlari o‘tkaziladi.

2 ta ko‘cha kesishmalarida kabel tarmoqlari o‘rnatiladi

Ma’lum qilinishicha, Toshkent shahri Yakkasaroy tumanidagi Bobur ko‘chasining bir qismida avtomobillar harakati qisman cheklanadi, deya xabar bermoqda “Toshkent shahar elektr tarmoqlari” kompaniyasi.

Shuningdek, mazkur ko‘chaning Shota Rustaveli ko‘chasi bilan kesishmasidan Seul ko‘chasi bilan kesishmasigacha Shayxontohur tumandagi iste’molchilarni energiya resurslari bilan barqaror ta’minlash maqsadida ko‘chada 110 kilovattli yuqori kuchlanishli yer osti elektr uzatish kabel tarmoqlarini o‘tkazish rejalashtirilmoqda.

Avtomobillar vaqtinchalik yo‘lning 2 chizig’ida harakatlanadi

Shu tufayli 16-oktyabrdan 15-noyabrga qadar Bobur ko‘chasining ushbu qismida to‘rt chiziqli yo‘lning ikki chizig‘ida harakat cheklanadi, avtotransport oqimi esa qolgan ikki chiziqqa yo‘naltiriladi.

Shuning bilan birga, kompaniya noqulayliklar uchun uzr so‘rab, yuzaga kelishi mumkin tirbandliklarning oldini olish uchun haydovchilarga aylanma yo‘llardan foydalanishlarini tavsiya qilmoqda.