O‘zbekiston chempionatida million yevrodan qimmat futbolchilar soni 6 taga yetdi

2024-yilgi mavsum yakunlariga ko‘ra, Transfermarkt portali O‘zbekiston chempionatida to‘p surayotgan futbolchilarning transfer bahosini yangiladi. 

Eng qimmat futbolchi

Superliganing narxi eng ko‘p ko‘tarilgan va endilikdagi eng qimmatbaho o‘yinchisi "Nasaf" futbol klubi va O‘zbekiston milliy terma jamoasi a’zosi Abduvohid Nematov bo‘ldi. Darvozabon "Nasaf"da ajoyib mavsum o‘tkazdi. U Superligada 25 ta o‘yinda 16 ta gol o‘tkazdi va 14 ta uchrashuvda raqiblar uning darvozasiga yo‘l topa olishmadi. Bundan tashqari Ne’matov 2 ta penaltini aniq amalga oshirdi. Uning narxi 600 ming yevroga ko‘paydi.

Narxi ko‘tarilgan o‘yinchilar 

Portal ma’lumotlariga ko‘ra, Akmal Mozgovoy ("Nasaf"), Lyupcho Doriyev ("So‘g‘diyona") va Abdug‘afur Haydarov ("Surxon")ning narxlariga 300 ming yevrodan qo‘shilgan. "Dinamo" safida sermahsul mavsum o‘tkazgan Joel Kojoning narxi 250 ming yevroga ko‘paygan. Shuningdek, Sherzod Nasrullayev ("Nasaf"), Islom Qobilov va Vladimir Yovovich (ikkisi "So‘g‘diyona"), Xislat Halilov ("Dinamo"), Bilolxon Toshmirzayev ("Neftchi"), Eldor Adhamov ("Andijon") va Nodir Soyibov ("So‘g‘diyona") kabi futbolchilarning narxi 200 ming yevrodan oshgan.

Narxi pastlagan o‘yinchilar 

Transfermarkt portali mamlakat chempionatida faoliyat olib borgan va narxi pastlagan futbolchilarning ro‘yxatini ham keltirib o‘tgan. Unga ko‘ra, narxi eng ko‘p pastlagan futbolchilarning TOP-10 ligi quyidagicha: 

1. Sardor Sobirxo‘jayev ("Paxtakor") - 200 ming yevro;
2. Ibrohim Yo‘ldoshev ("Navbahor") - 200 ming yevro.
3. Dilshod Saitov ("Paxtakor") - 150 ming yevro;
4. Asadbek Sobirjonov ("Metallurg") - 150 ming yevro;
5. Timur Mamasidiqov ("Lokomotiv") - 150 ming yevro;
6. Mirjahon Mirahmadov ("Bunyodkor") – 125 ming yevro;
7. Sardor Mirzayev (OKMK) - 125 ming yevro;
8. Hojiakbar Alijonov ("Paxtakor") - 100 ming yevro;
9. Dostonbek Hamdamov ("Paxtakor") - 100 ming yevro;
10. Azizbek Amonov ("Neftchi") - 100 ming yevro.

O‘zbekiston chempionatining eng qimmat futbolchilari — TOP-10 

Eng qimmat futbolchi nomini "Nasaf" darvozaboni Abduvohid Ne’matov Hamrobekovdan olib qo‘ygan bo‘lsa, ikkinchi o‘ringa "Nasaf" bilan chempion bo‘lgan yana bir futbolchi Akmal Mozgovoy chiqib oldi - 1,3 million yevro. Klubning yana bir futbolchisi Sherzod Nasrullayev esa Hamrobekovga yetib oldi. Lyupcho Doriyevning narxi 1,3 million yevroga yetdi. Superligamizda endi 1 million yevrodan qimmat bo‘lgan legioner bor. Shuningdek, endilikda O‘zbekiston Superligasida narxi 1 million va undan ko‘p bo‘lgan 6 nafar futbolchi mavjud.