“PSJ” yoki “Arsenal” : “PSJ” Abduqodir Husanovga qiziqish bildirmoqda

Fransiya va dunyoning yetakchi jamoalaridan biri, Parij shahrining “PSJ” futbol klubi O‘zbekiston terma jamoasi a’zosi hamda “Lans” klubi himoyachisi Abduqodir Husanovga qiziqish bildirmoqda. Qayd etilishicha, Luis Kampos boshchiligidagi “Pari Sen-Jermen” klubi markaziy himoyani kuchaytirish uchun hamyurtimizni munosib nomzod sifatida ko‘rmoqda. 

Futbolchi haqida

O‘zbekistonlik markaziy himoya vakili o‘zining ajoyib o‘yinlari bilan yoshlikdan e’tibor markazida bo‘lib kelgan. Belarusdagi “Energetik-BGU” Minsk klubidagi o‘yinlari sabab 2023-yil yozida “RK Lans” uni atigi 100 000 yevro evaziga transfer qildi. “Liga 1”dagi dastlabki o‘yinlari ehtiyotkor o‘tgan bo‘lsa-da, u tez orada asosiy tarkibdagi muhim o‘ringa ega bo‘ldi. Ilk mavsumidayoq 15 ta o‘yinda maydonda harakatlana oldi. Futbolchimiz “RK Lans”ning himoya markazidagi Kevin Dansoning vorisi sifatida ko‘rilyapti. 1,86 metr bo‘yi va 84 kilogramm vazni bilan u nafaqat duellarda ishonchli, balki hujumchilarga qarshi tezkorligi bilan ham ajralib turadi. 

“PSJ”ning rejalari Lansga maqbul kelmasligi mumkin

“Foot Mercato” nashrining xabariga ko‘ra, “PSJ” qishki transfer oynasida himoyachi qidirmoqda va jamoa Husanovni yaxshi variant deb biladi. Uning “Lans” bilan shartnomasi 2027-yilgacha amal qiladi, biroq bu Luis Kamposni uning atrofidagi shaxslar bilan uchrashuv o‘tkazishdan to‘xtatmadi. Bor-yo‘g‘i 20 yoshida Husanov o‘zida tajriba va istiqbolni mujassam qilgan futbolchi Yevropa grandlari uchun juda qiziqarli maqsadga aylanmoqda. Nashrning qaydicha, Benfika himoyachisi Tomas Araujo kabi nomzodlarga qaraganda Husanov ko‘proq imkoniyatga ega ko‘rinadi. Uning 20 million yevrolik bahosi ham “Liga 1”da o‘zini isbotlagan o‘yinchi uchun arzirli. Shunga qaramay, “RK Lans” uni qishda qo‘yib yuborishni xohlamasligi mumkin, harchand klubga moliyaviy barqarorlik uchun 40 million yevro kerak bo‘lishi aytilmoqda.

Shimoliy London shamoli

So‘nggi ma’lumotlarga ko‘ra, Xusanovni har tomonlama o‘rganib chiqqan “PSJ” sport direktori - Luis Kompas Arsenaldan yaqinda ketgan sport direktor - Edu Gaspar o‘rnini egallashi kutilmoqda. Agarda Parij jamoasi qishki transfer oynasida Xusanovni olib kela olmasa, futbolchi Shimoliy Londonga yo‘l olish ehtimoli oshishi mumkin.

So‘nggi transfer o‘zgarishi

7-oktyabr kuni Transfermarkt portali Fransiya chempionatida to‘p tepayotgan futbolchilarning transfer narxini yangilagandi. Unga ko‘ra, O‘zbekiston milliy terma jamoasi va “Lans” klubi himoyachisi Abduqodir Husanovning narxi ikki baravarga oshdi va 5 million yevroga yetgan. Bunga qadar Husanovning narxi 2,5 million edi. Abduqodir o‘zbekistonlik futbolchilar orasida narx bo‘yicha ikkinchi o‘ringa chiqib oldi. Ayni paytda eng qimmat o‘zbekistonlik futbolchi Abbos Fayzullayev hisoblanadi - 6 million. Husanov esa Eldor Shomurodov bilan birga ikkinchi o‘rinda bormoqda.

“Lans” klubining muvaffaqiyati va kelgusidagi rejalari 

“Lans” klubi keyingi yil yozda Husanovning transferidan kamida 40 million yevro ishlab olmoqchi. Fransiyalik ekspertlarning fikriga ko‘ra, Husanovning transfer bozoridagi narxi 30-40 million yevrogacha oshishi mumkin. “Tvitter” (X) ijtimoiy tarmog‘ida 2 milliondan ortiq obunachiga ega “BeFutbol” sahifasining mashhur “L’Equipe” nashriga tayanib yozishicha, “Lans” 2023-yilda Abduqodir Husanovni “Energetik-BGU”dan 100 ming yevroga sotib olgan va hozirga kelib o‘zbekistonlik 20 yoshli himoyachining transfer narxi 100 baravarga oshgan.