Suv toshqiniga elektr uzilishing hech qanday aloqasi yo‘q

Yunusoboddagi suv quvurlari yorilishiga elektr uzilishi sabab bo‘ldi degan gapni Energetika vazirligi rad etdi.

Yunusoboddagi suv quvuri uzildi

Bugun ertalab Toshkent shahri Yunusobod tumanidagi suv quvurlarida uzilish kuzatilgan (https://t.me/uzsuvtoshshahar/2491) hamda Moyqo‘rg‘on va Qoraqamish ko‘chalarida 1200 millimetrlik suv quvurlari yorilib ketgan. Buning oqibatida esa Tiklanish mahallasi 1,2,3,4,5,6, tor ko‘chalari, G‘ishtqo‘rg‘on ko‘chalari, Astrabod mahallasi, Turkiston, Sobirobod mahallalarida, Zenit zavodi, Prokuratura akademiyasi, Pivo zavodida suv ta’minoti uzilib qoldi.

“Hammasi qozonxonadagi elektr uzilishi sabab”

Bu vaziyatga Toshkent shahar suv ta’minoti"ning axborot xizmati bo‘limi boshlig‘i Ravshan Yoqubjonov munosabat bildirdi (https://t.me/poytaxt_uz/32487). “Bunga yaqin joydagi qozonxonada vaqtincha elektr energiyasining uzilishi sabab bo‘lgan, quvurlarda bosim ko‘tarilib ketgan va ularning ulangan chokidan avariya yuzaga kelgan. Buning natijasida tashqariga suv sizib chiqqan”, - deydi u.

“Hech qanday elektr uzilishi ro‘y bermagan” – Energetika vazirligi

Ammo Yoqubjonovning gapini Energetika vazirligi rad etdi, ular 4-sonli qozonxonada hech qanday elektr uzilishi ro‘y bermaganini bildirishdi. “Suv toshqiniga qozonxona faoliyatining hech qanday aloqasi yo‘q. 4-sonli qozonxona 2024-yilning 2-iyulidan 3-iyuliga o‘tar kechasi barqaror va shtat rejimida faoliyat yuritgan”, - deyiladi vazirlik xabarida (https://t.me/minenergy_uz/11989).