Katanes ketib, Kapadze kelishi kutilayotgan O‘zbekiston terma jamoasi bosh murabbiyligi “o‘rindig‘i”: Endi nima bo‘ladi, nimalar o‘zgardi?

Bugun O‘zbekiston milliy jamoasi bosh murabbiyi Srechko Katanes sog‘lig‘idagi muammolar sabab lavozimini tark etdi. Uning o‘rniga Temur Kapadze kelishi kutilmoqda. Murabbiy O‘zbekistondagi faoliyati davomida nimalarni o‘zgartira oldi?

Bugun O‘zbekiston futbol assotsiatsiyasi axborot xizmati O‘zbekiston milliy terma jamoasi bosh murabbiyi Srechko Katanes sog‘lig‘i bilan bog‘liq muammolar sababli O‘FA bilan tuzilgan shartnomani o‘zaro rozilik bilan bekor qilishga qaror qilganini ma’lum qildi. Sloveniyalik murabbiy o‘z murojaatida hozirgi holatida vazifalarini to‘laqonli, professional tarzda bajara olmasligini afsus bilan qayd etib, doimiy qo‘llab-quvvatlagani va samarali hamkorlik uchun assotsiatsiyaga o‘z minnatdorchiligini bildiradi. “O‘FA hamda Srechko Katanes o‘rtasidagi shartnoma o‘zaro do‘stona munosabatlarni saqlagan holda bekor qilindi. O‘zbekiston futbol assotsiatsiyasi milliy terma jamoamiz bosh murabbiyi lavozimiga munosib nomzod tayinlash borasida ish olib bormoqda”, deyiladi O‘FA rasmiy sahifasida.

O‘FA va Katanes o‘rtasida tuzilgan shartnoma shartlari

2021-yilning 27-oktyabr kuni Srechko Katanesning O‘zbekiston futbol assotsiatsiyasi bilan shartnoma imzolash marosimi bo‘lib o‘tgan. Shartnomaga ko‘ra, sloveniyalik mutaxassis 2025-yilga qadar O‘zbekiston milliy terma jamoasi bosh murabbiyi sifatida faoliyat yuritishi kerak bo‘lgan. OAV ma’lumotlariga ko‘ra, mutaxassisning maoshi yiliga 1,2 million dollarni tashkil etgan. 

Muammolar va onkologik xastalik

Jamoa bosh murabbiyi dastlab 2023-yilning iyun oyida sog‘lig‘idagi muammo sabab, davolanish maqsadida o‘z uyiga ketgan edi. Shundan so‘ng, janob Katanes 2024-yilning mart oyida bo‘lib o‘tgan JCH-2026 saralash bosqichi doirasidan o‘rin olgan Gonkongga qarshi o‘tgan Toshkentdagi uchrashuvni ham kutilmaganda sog‘lig‘i bilan yuzaga kelgan muammolar tufayli o‘z vatani Sloveniyaga jo‘nab ketishga majbur bo‘lib, o‘tkazib yuborgandi. Keyinchalik, 2024-yilning 5-iyun kuni O‘zbekiston milliy terma jamoasi bosh murabbiyi Srechko Katanes Turkmaniston terma jamoasi bilan o‘yin oldi tashkil qilingan matbuot anjumanida salomatligi bilan bog‘liq masalaga to‘xtaldi. "Sog‘ligim haqida to‘liq aytib bersam, ancha vaqt kerak bo‘ladi. Ayni paytda sog‘ligim ancha yaxshi. Agar uchinchi marta terma jamoani sog‘ligim tufayli tark etsam, boshqa qaytib kelmayman" — dedi murabbiy. Saytimiz orqali 2024-yilning mart oyida e’lon qilingan va tasdiqlanmagan ma’lumotga ko‘ra, murabbiy uzoq vaqt davolanish va katta mablag‘ni talab etadigan onkologik xastalikka chalinganini ma’lum qilgan edik. Bugun O‘FA tomonidan e’lon qilingan xabar har gal ommaga taqdim qilinar ekan, murabbiy atrofida yana mana shu masala aktuallasha boshlaydi.

Katanes haqida

Srechko Katanes 1963-yilda Sloveniyaning Lyublyana shahrida tavallud topgan. 1981-1994-yillar davomida “Partizan”, “Shtutgart”, “Sampdoriya” kabi jamoalarda to‘p surgan. Ushbu davr mobaynida A-Seriya va Italiya kubogini qo‘lga kiritgan, shuningdek, UEFA Championlar ligasi va UEFA Kubogi final uchrashuvlarida ishtirok etgan hamda Yevropa Kubok egalari kubogida zafar quchgan. Murabbiylik faoliyatida esa Makedoniya, Birlashgan Arab Amirligi, Sloveniya va Iroq milliy terma jamoalarini boshqargan. U Sloveniya bilan Yevro-2000 va JCH-2002da qatnashgan. Shuningdek, Osiyo Kubogi-2019da Iroqni boshqaradi. Keyinchalik esa O‘zbekiston terma jamoasi bilan Osiyo Kubogi-2023da musobaqaning chorak finaliga qadar yetib boradi. 

Murabbiy nimalarni o‘zgartira oldi?

Murabbiy O‘zbekiston bosh jamoasidagi faoliyati davomida 42 ta o‘yin o‘tkazib, ularning 26 tasida g‘alaba qozongan bo‘lsa, 8 tasida durrang va yana 8 tasida mag‘lubiyatga uchragan. Gollar nisbati esa — 83 ga 38. Bu vaqt oralig‘ida jamoa taktik sxemasida ham yaxshigina o‘zgarish yuz berdi. Katanes terma jamoaning odatiy 4 ta himoyachilik sxemasini barcha talqin qilayotgandek 5 taga emas, 3 taga o‘zgartirdi. Umumiy olib qaraganda 3-4-3 O‘zbekiston terma jamoasining asosiy taktik chizgisiga aylandi. Bu sxemaning qulayligi u futbolchilarning jismoniy holati va o‘yinning borishiga qarab 5-2-3 yoki 3-4-3 ga o‘zgara oladi. Bunda ikki qanot himoyachilari lateral vazifasini o‘taydi. Jamoa bu vaqt davomida Shvetsiya, Kamerun, Kosta-Rika, Venesuela, Boliviya, AQSH hamda Meksika kabi dunyoning yetakchi terma jamoalari bilan o‘rtoqlik o‘yini o‘tkazdi. 61 yoshli mutaxassis qo‘l ostida milliy jamoa Osiyo Kubogi-2023da chorakfinalgacha yetib bordi, JCH-2026 saralashida esa 3-bosqichga chiqdi va ayni vaqtda guruhda mundialga yo‘llanma beradigan 2-o‘rinni egallab turibdi.

Katanes “ko'rikdan o'tkazgan” futbolchilar

Mahalliy mutaxassislar tomonidan ichki chempionatni yetarlicha kuzatmaslik va o‘yin salohiyati borasida terma jamoaga munosib bo‘lgan futbolchilarga imkoniyat bermayotganlikda ko'p bor ayblangan murabbiy shu kunga qadar necha nafar futbolchiga imkoniyat bergan? Murabbiy shu vaqtga qadar 59 ta futbolchini “ko'rikdan o'tkazgan”. Ular quyidagilar:

1. Farrux Ikramov

2. Oybek Bozorov

3. Jaloliddin Masharipov

4. Eldor Shomurodov

5. Odil Hamrobekov

6. Otabek Shukurov

7. Farruh Sayfiyev

8. Abdulla Abdullayev

9. Doston Tursunov

10. Xojiakbar Alijonov

11. Eldor Suyunov

12. Sanjar Qodirkulov

13. Abror Ismoilov

14. Ibrohimhalil Yo‘ldoshev

15. Igor Sergeyev

16. Xojimat Erkinov

17. Aziz Amanov

18. Sanjar Quvvatov

19. Valijon Rahimov

20. Husniddin Aliqulov

21. Islom Qobilov

22. Akmal Mozgovoy

23. Dilshod Saitov

24. Doston Hamdamov

25. Xusayn Norchayev

26. Rustam Ashurmatov

27. Shahboz Umarov

28. O‘tkir Yusupov

29. Aziz G‘aniyev

30. Davron Hoshimov

31. Ikrom Aliboyev

32. Anzur Ismoilov

33. Islom Kenjaboyev

34. Javohir Sidiqov

35. Umid Ergashev

36. Umar Eshmurodov

37. Sherzod Nasrullayev

38. Sardor Sobirxo‘jayev

39. Aziz Turg‘unboyev

40. Sherzod Temirov

41. Oston O‘runov

42. Botirali Ergashev

43. Abduvohid Nematov

44. Saidazamat Mirsaidov

45. Alibek Davronov

46. Ruslan Jiyanov

47. Bobur Abduxoliqov

48. Jasur Yaxshiboyev

49. Ibrohim Yo‘ldoshev

50. Jamshid Iskandarov

51. Abduqodir Xusanov

52. Jamshid Boltaboyev

53. Abbos Fayzullayev

54. Shahzod Azmiddinov

55. Zafarmurod Abdurahmatov

56. Muhammadqodir Xamraloyev

57. Diyor Xolmatov

58. Abdurauf Bo‘riyev