O‘zbekistonga telefon olib kirish yanada qiyinlashdi

2024-yilning kuzida O‘zbekiston Bojxona qo‘mitasi va UzIMEI tizimi telefonlarni deklaratsiya qilish jarayonini yangi bosqichga olib chiqdi. Endilikda mamlakatga olib kelingan telefonlarni ro‘yxatdan o‘tkazish uchun ularning bojxona deklaratsiyasini taqdim etish majburiy hisoblanadi. Ushbu qoidalar nafaqat chet eldan olib kelingan telefonlarga, balki ichki bozorda sotib olingan qurilmalarga ham ta’sir ko‘rsatmoqda.

Bojxona deklaratsiyasiz telefon ro‘yxatdan o‘tmaydi

O‘zbekiston Raqamli texnologiyalar vazirligi bergan izohga ko‘ra, yangi tartibda telefonni ro‘yxatdan o‘tkazishda UzIMEI tizimi avtomatik ravishda bojxona ma’lumotlar bazasi bilan bog‘lanadi. Agar telefonning deklaratsiya ma’lumotlari tizimda mavjud bo‘lmasa, qurilmaning bojxona qiymatining 30% miqdorida boj to‘lovi undiriladi. Shundan so‘nggina qurilma ro‘yxatga olinadi. Bu jarayon yakunlanmaguncha telefondan foydalanish mumkin bo‘lmaydi.

Cheklovlar va bojxona talablari

Fuqarolar havo yo‘llari orqali ikki dona telefonni bojxona to‘lovisiz olib kelishlari mumkin. Biroq, qurilmalarning umumiy qiymati $2000dan oshmasligi lozim (poyezdda $1000, avtomobilda $300gacha). Agar belgilangan limitdan oshsa, ortiqcha summa uchun 30% miqdorida boj olinadi. Ushbu qoidalar Vazirlar Mahkamasining 2019-yildagi qarori va 2024-yil yanvarida kuchga kirgan o‘zgarishlar asosida amalga oshirilmoqda.

Deklaratsiya qilinmagan qurilmalar bilan bog‘liq xavf

Bojxona qo‘mitasi IMEI kodlarni ro‘yxatdan o‘tkazish jarayonida deklaratsiyalanmagan telefonlarni aniqlashni maqsad qilgan. Qo‘mita vakillarining ta’kidlashicha, agar telefonning deklaratsiyasi bo‘lmasa, undan foydalanish cheklab qo‘yiladi. Shu sababli bozorlarda yoki internet-do‘konlarda telefon xarid qilayotganda, uning UzIMEI tizimida ro‘yxatdan o‘tganligini tekshirish tavsiya etiladi.

Fuqarolar uchun muhim tavsiyalar

Shuningdek, Qo‘mita bozorlarda, savdo shoxobchalarida yoki internet-do‘konlarda telefon xarid qilayotganda UzIMEI tizimida ro‘yxatdan o‘tganligini tekshirishni tavsiya etdi. Agar qurilma ro‘yxatdan o‘tmagan bo‘lsa, xaridorlar bojxona to‘lovlarini o‘zlari to‘lashga majbur bo‘ladilar. Savollar tug‘ilganda 1108 raqamiga murojaat qilish mumkin.