Superligada oktyabr oyining eng yaxshilari aniqlandi

Professional futbol ligasi o‘z odatiga ko‘ra, oyning eng yaxshi murabbiy va futbolchisi, shuningdek, eng chiroyli golini ma’lum qildi.

Eng yaxshi murabbiy

Oktyabr oyi yakunlariga ko‘ra, Nasaf jamoasi bosh murabbiyi Ro‘ziqul Berdiyev oktyabr oyining eng yaxshi murabbiyi deb topildi. Oy murabbiyini aniqlashda mutaxassislar yuqoridagi rasmda ifodalanganidek tanlovni amalga oshirgan.

Eng yaxshi futbolchi 

O‘tgan oy Superligada 3 o‘yinda maydonga tushib, raqib darvozasiga 5 ta to‘p kiritgan Abdug‘afur Haydarov (Surxon) esa eng yaxshi futbolchi bo‘ldi. Ushbu nominatsiyaga mutaxassislar ortiqcha shubha bildirmasdan ovoz berishdi.

Eng chiroyli gol

Nasaf a’zosi Akmal Mozgovoyning Lokomotiv jamoasi darvozasiga kiritgan to‘pi oktyabr oyining eng chiroyli goli deya e’tirof etildi. Ushbu gol Qarshi jamoasining chempionligiga sabab bo‘ldi, desak xato bo‘lmaydi. Mutaxassislarning barchasi bu golni bir ovozda qo‘llab-quvvatlashdi.