O‘zbekiston “Statistika faoliyati samaradorligi indeksi”da 62-o‘rinni egalladi

Jahon Banki tomonidan ishlab chiqilgan va mamlakatlarning statistik salohiyatini baholash uchun qoʻllaniladigan “Statistika faoliyati samardorligi indeksi” (Statistical Performance Indicators — SPI)ning 2023-yil natijalari eʼlon qilindi. Ushbu indeks yangi metodologiya asosida tuzilgan boʻlib, mamlakatlarning statistik imkoniyatlari va islohotlarini baholaydi. 

O‘zbekistonning reytingdagi oʻsishi

2023-yil natijalariga koʻra, Oʻzbekiston 80,3 ball toʻplab, 217 mamlakat orasida 62-oʻrinni egalladi. Shuningdek, Oʻzbekiston MDH davlatlari ichida 4-oʻringa koʻtarilib, oʻz natijalarini sezilarli darajada yaxshilagan. Maʼlumot uchun, 2022-yilda O‘zbekiston 74,1 ball bilan 79-o‘rinni egallagan edi.

 Oʻzgarishning asosiy sabablari 

Oʻzbekistonning reytingda yuqorilashiga quyidagi omillar hissa qoʻshgan: 

1. Statistik tizimning sifatini oshirish: Milliy statistika tizimiga GSBPM va GSIM kabi ilgʻor boshqaruv tizimlarini joriy etish. 

2. Barqaror rivojlanish maqsadlari: BMTning global indikatorlariga asoslangan milliy indikatorlarni ishlab chiqish va muntazam eʼlon qilib borish. 

3. Shaffoflik va ochiqlik: Rasmiy statistik maʼlumotlarning milliy va xalqaro foydalanuvchilar uchun maksimal darajada ochiqligini taʼminlash. 

4. Milliy hisoblar tizimi: “MHT-2008”ning Oʻzbekistonda toʻliq amaliyotga joriy etilishi. 

 Statistika indeksi nima uchun muhim? 

Mazkur indeks Oʻzbekistonning statistik salohiyatini, erishilgan yutuqlarni va milliy statistika tizimini rivojlantirishda amalga oshirilgan islohotlarni aks ettiradi. Oʻzbekistonning ushbu sohadagi muvaffaqiyatlari xalqaro reytinglarda ham oʻz aksini topmoqda.